İşğalciler qırımtatar milliy areketiniñ veteranı Rustem Useinovnıñ vagonını alıp kettiler

20 March 2025

Saban ayınıñ 20-nde saba Sudaq civarındaki Qapsihor (Morske) köyünde Rusiye quvetçileri qırımtatar milliy areketiniñ veteranı Rustem Useinovnıñ yaşağanı vagonnı sarıp aldılar.

Facebook saifesinde Qırımtatar Milliy Meclisiniñ reisi Refat Çubarov bu aqqında yazdı.

“Bilgenime köre, şimdi vagon qoyulğan yerde Rustem ağa ev qurğan edi, amma onı 2014 senesi Rusiye Qırımnı işğal etkenine qadar resmiyleştirmedi. 2021 senesi boş ayda Rusiye cezalandırıcıları evini yıqtılar. Amma Rustem ağa, öz aqlarını qorçalap, qanunsız yıqılğan eviniñ yerinde mesken vagonnı qoydı”, – dep Refat Çubarov bildirdi.

Çubarov şunı da qayd etti ki, saban ayınıñ 20-nde saba Qapsihor (Morske) köyüniñ yalısına Rusiye işğalcileri tarafından ketirilgen tehnika ve silâlı insanlarnıñ sayısına köre, şimdi mesken vagon da yıqılacaq.

Daa soñra “Qırım birdemligi”niñ bildirgenine köre, Rustem Useinovnıñ yaşağanı vagon Rusiye quvetçileri tarafından endi alıp çıqarıldı..

“Atta içimde olğan ilâclarım bar, ve künde 10 ap almaq mecburım. Bularnıñ episini olarğa da berdim, bir şey almadım. Eşyalarımnı alıp, vagonımnı almağa ruhset bersem, yapqanım qanunsız olğanını kösterir, olarnıñ yapqanlarını qabul eter edim. Onı qaysı tarafqa alıp ketkenlerini baqmağa da bermedim. Aman-aman beş yıl evelsi evim yıqılğan soñ, eşyalarımnıñ ne olğanını bilmeyim”, – dedi qırımtatar milliy areketiniñ veteranı.

Rustem ağa, nasıl ve ne yerde yaşacağını ayttı: öz toprağında. Onıñ qayd etkenine köre, onıñ bir qaç poddonı qalğan, anda ise qurucılıq malzemeleri tura edi. Adam onıñ tübünde çadırnı qurmağa planlaştıra.

“Şimdi alış-verişke baracağım, çadırnı qıdıracağım ve anda yaşaycağım. Ev yıqılğan soñ, eki yıl devamında çadırda yaşadım, amma o endi yaramay”, – dep qoştı o.