Odesada Reşat Ametov soqağı ve Çelebicihan adına şeer bağçası olacaq

29 Iyül 2024

Soqaq ve şeer bağçasınıñ adlarını, Qırımnıñ rus işğalinen küreşkenlerniñ adlarına deñiştirecekler. 

Odesada, qıtaviy Ukrainada ilk kere, belli qırımtatar erbapları olğan Reşat Ametov ve Noman Çelebicihan adlarına soqaq ve şeer bağçası olacaq. 

Odesa vilâyetiniñ şurasınıñ mebusı, “Odesa vilâyetiniñ qırımtatarları” Cemaat teşkilâtınıñ (CT) başı Fevzi Mamutov QIRIM.Newske bu aqqında haber berdi.

Dekolonizatsiya qanunı çerçivesinde Odesa şeerinde rus imperializmine ait olğan insanlarnıñ adlarınen bağlı olğan toponimlerni deñiştireler. 

Mamutovnıñ qayd etkenine köre, qırımtatar cemaatı, “Odesa vilâyetiniñ qırımtatarları” CT, “Avropa birdemligi” fırqası, Odesa vilâyetiniñ reberliginiñ teşebbüsinen Odesa vilâyetindeki Paustovskıy bağçası, qırımtatar siyasiy ve devlet erbabı, birinci Qurultaynıñ teşklicilerinden biri, 1917 senesi Qırım Demokratik Cumhuriyetiniñ ükümetiniñ birinci başı, Qırım, Litva, Poloniya ve Belarus musulmanlarınıñ birinci müftisi Noman Çelebicihan adını taşıycaq.

Roman Karmen soqağı ise 2014 senesi Qırım zapt etilgen soñ işğalciler tarafından öldürilgen Ukraina Qaramanı ve faalci Reşat Ametov adını taşıycaq. 

“Odessanıñ esas Ukrainada qırımtatarlarnıñ adları qoyulğan birinci soqaq ve bağça olması pek müimdir. Ametov 2014 senesi rusiyeliler tarafından öldürildi, Çelebicihan ise ömür boyu Rusiye imperializminen küreşti”, – dep Fevzi Mamutov ayttı ve qoştı ki, umumen qanun çerçivesinde Odesanıñ eñ az 100 soqağınıñ adları deñiştirilecek. 

Bundan ğayrı o, añlı ukrain siyasiy milletiniñ şekillenmesi içün ad deñiştirüvniñ müimligini qayd etti.

“Köçerlerniñ adlarını qırımtatarlar, yeudiler, bulğarlar ve ilâhre adlarına deñiştirüv – siyasiy milletniñ meydanğa ketirüv esnasıdır. Bu, bir de bir vaqıtları Rusiye kolonizatsiyasına qarşı küreşte iştirak etken insanlardır. Bu sebepten soqaqlarğa, meydanlarğa, bağçalarğa olarnıñ adlarını bermek kerek. Bu, Ukraina devletçiliginiñ añına doğru ketkenimizniñ daa bir delilidir”, – dep Mamutov qayd etti.

Bundan da ğayrı, Fevzi Mamutov, ad deñiştirüvine qol tutqan Odessa cemiyetine minnetdarlığını bildirdi.