Mustafa Cemilev ve Refat Çubarovnıñ Çehiya Cumhuriyetiniñ Prezidenti Petr Pavelnen körüşüvi

01 Mayıs 2023

2023 senesi çiçek ayınıñ 28-inde Kıyivde qırımtatar halqınıñ lideri, Ukraina halq mebusı Mustafa CEMİLEV ve Qırımtatar Milliy Meclisiniñ Başı Refat ÇUBAOVNIÑ Çehiya Cumhuriyetiniñ Prezidenti Petr PAVELnen körüşüvi keçirildi. Petr Pavel Ukrainanı ziyaret etti.

Bundan ğayrı körüşüvde  Ukrainadaki Çehiya Salâhiyetli ve Vekâletli Elçisi Radek MATULA ve Çehiya Cumhuriyetiniñ Prezidentini ozğağan insanlar iştirak ettiler.

Çehiya Cumhuriyetiniñ Prezidenti Petr PALEV, deyerli 55 sene evel olğan vaqianı hatırlayaraq, subetni başlattı. 1968 senesi 25 yaşındaki Mustafa CEMİLEV, sovet ordusınıñ Çehoslovakiyağa tecavuzını ve kelecek işğalini cemaat ögünde tekbih etti.

Çeh halqı, Prezidenti Petr PAVEL, Ükümeti ve Çehiya Cumhuriyetiniñ Parlamentiniñ printsipli menfaatı, Ukrainanıñ topraq bütünligini destek etmeleri, arbiy ve başqa yarım bermeleri, işğal etilgen Qırımda qırımtatar halqınıñ vaziyetine diqqat celp etmeleri teşekkür bildirip, Mustafa CEMİLEV rus tecavuzına qarşılıq köstermek içün kelecek halqara birleşmeniñ müimligini qayd etti.

Bunıñ içün Mustafa CEMİLEV devam etti, demokratiya qaidelerini er vaqıt qoçalağan Çehiya Cumhuriyetiniñ menfaatı ve bütün devletlerniñ halqara uquq qaidelerini riayet etmek kerekligi pek müim. 

Qırımtatar Milliy Meclisiniñ Başı Refat ÇUBAROVPrezident Petr PAVELniñ rus işğalcilerinden azat etilecek Qırımnıñ reintegratsiya basamağında olacaq eñ aktual meselelernen bağlı sualine cevap bergende rus işğalcileriniñ bozğanları yarımadanıñ etraftaki müiti ve ekologik vaziyetini normalaştıruv, rus işğali şartlarında maqsatlı tarza viran etilgen qırımtatar tarihı ve medeniyetiniñ abidelerini qurtaruv, toponimiyani russızlaştıruv, işğal etilgen Qırımda qanunsız olaraq yerleşken yüz biñlerce insannıñ çıqışını uquqiy vesiqalaştıruvnen bağlı meselelerni tafsilâtlıca bildirdi.

Refat ÇUBAROV, Ukraina Qanunnamesine deñişmeler kirseterek, Qırımnıñ şimdiki muhtar statusınıñ transformatsiya meselesini ayrıca müim biri olaraq qayd etti. O, Ukraina devletiniñ ayırılmaz qısmı qalacaq Qırımda tamır qırımtatar halqını özüni tesbit etüv subyekti olaraq tanıycaq deñimelerdir.

Körüşüv vaqtında Çehiya Cumhuriyetiniñ Parlamentiniñ 1944 senesi mayıs ayınıñ 18-inde sovet rejimi tarafından yapılğan qırımtatar halqınıñ mecburiy sürgünligini qırımtatar halqınıñ genotsid aktı olaraq tanımasına dair Qırımtatar Milliy Meclisiniñ hitabı duyuldı.

 Körüşüv sıcaq ve dostane tarzda keçirildi, soñunda tarafları bir-birinen hatıralıqlarını deñiştiler.

P.S. Körüşüvniñ fotoresimine añşatuv: körüşüv başlaycaq yarım saat evel Kıyiv şeerinde ava telükesi ilân etildi. Mevanlarda azırlanğan rus uçaqlarından raketa ateşleriniñ yüksek mümkünligi bildirildi. Buna köre Çehiyanıñ vekilleriniñ bulunğanları binanıñ daa qorçalanğan qısmında körüşüv keçirildi.

Qırımtatar Milliy Meclisiniñ Matbuat hızmeti