Meclis vekilleri Türkiye elçisinen körüştiler

24 Yanvar 2024

2024 senesi qara qış ayınıñ 24-ünde Meclisniñ reberliginiñ davetine köre Türkiye Cumhuriyetiniñ Salâhiyetli ve Vekâletli Elçisi Mustafa Levent BİLGEN Qırımtatar Milliy Meclisini ziyaret etti. Onen beraber missiyanıñ başınıñ muavini Levent UĞURLU ve Elçilikniñ üçünci kâtibi Sevilây YILDIRIM Meclis ziyaret etti. 

Qırımtatar halqınıñ lideri Mustafa CEMİLEV, Qırımtatar Milliy Meclisiniñ Başı Refat ÇUBAROV, Meclisniñ Başınıñ muavinleri İlmi UMEROV ve Ahtem ÇİYGÖZ, Meclisniñ azaları Riza ŞEVKİYEV ve Eskender BARİİEVniñ iştirak etkenleri dostane ve ciddiy şubet vaqtında rusiye tarafından işğal etilgen Qırımda qırımtatar halqınıñ vaziyeti, yarımada rus tecavuzcılarından azat etilecek soñ onıñ reintegritasıyasınıñ hususiyetlerinen bağlı meselelerni muzakere ettiler.

Qırımtatar Milliy Meclisiniñ başı ve azaları, 2024 senesi devam etken rus-ukrain cenki şartlarında öz faaliyetiniñ esas yöneliişlerini türk diplomatlarına añlattılar, qırımtatar tiliniñ inkişafı saasında türk alimleri ve ihtisasiy müessiselerinen işdeşlik, gençlerniñ Türkiye universitetlerinde oqumaları, Türkiye ve Ukrainanıñ şeerleri arasında qardaş munasebetlerini muzakere ettiler.

Türkiyege tahliye etilgen ve vaqtınca halqara qorçalav astında bulunğan Ukraina vatandaşlarına yardımnen bağlı ameliy meselelerni de muzakere ettiler.

Körüşüvniñ soñunda taraflar, eki taraflı körüşüvlerni  muntazam tarzda keçirmege azırlığını bildirdiler.