Meclis, Türkiyede vatandaşlarımızğa diplomlarını nostrifikatsiya etmege yardım etemege teşebbüs etti

20 Yanvar 2023

2014 senesi Qırım işğal etilgen ve 2022 senesi Rusiye Federatsiyasınıñ Ukrainağa tolu miqyaslı tecavuzından soñ qırımtatar halqınıñ bazı vekilleri em qıtaviy Ukraina, em de vaqtınca işğal etilgen Qırımdan çıqmağa mecbur qaldı. 

Olarnıñ qısmı Türkiye Cumhuriyetinde vaqtınca yaşamağa qarar berdi. Medeniyet, din, tiller, nazar noqtaları, em de Qırımğa maqbul yaqınlıq sebebinden. Çünki köçip kelgenerniñ çoqusı Qırımğa qaytacağına ümüt ete.

2022 senesi tecavuzdan soñ Ukraina vatandaşlarını alğan dünyanıñ bazı ülkelerge baqmadan, köçip kelmege mecbur qalğan kişiler Türkiyede bulunmaları içün öz cebinden ödemeliler. Türkiye, Avropanıñ bazı ülkelerde kibi, köçip kelgenlerge bu tür içyimaiy paket bermey.

Çoqusı allarda Türkiyede bulunğan qırımtatarlar – yüksek tasilge saip ve yaşayışnıñ farqlı saalarında mütehassılar olğan kişilerdir. Belli ki, Türkiye Cumhuriyetiniñ qanunlarına mücibi, anda (ayrıca tibbiyet saasında) resmen çalışmaq içün diplomlarnı nostrifikatsiya etmek kerek. Türk qanunlarında bu ceryan açıq aydın bir tazda añlatıldı, amma onıñ bazı zorluqları bar, çoq vaqıt ve para alır. Öz isteklerine qarşı Ukrainanıñ topraqalarından ayırğan, mında ev kiramağa mecbur olğan ve çalışmağan insanlar içün bu tür ceryan pek zordır.

Qırımtatar Milliy Meclisi, yani Qırımtatar Milliy Meclisiniñ Başı Refat Çubarov, Meclisniñ azası Gayana Yüksel, qırımtatar faalcisi Ruslan Ramazanov birinciden qırımtatar cemaatında bu meseleni baqmağa ve muzakere etmege teşebbüs ettiler.

 Böylece eki ay devamında vaziyet qıymetlendirile edi ve şu anda Türkiye Cumhuriyetinde bulunğan qırımtatarlarnıñ tasil potentsialı ögrenile edi.Teşebbüs gruppası teşkil etildi. O etrafında bu meselege lâqaytsız kişiler toplandılar. Er şey muzakere etildi: muntazam yaşama ruhsetini aluv, “türk soylu” statusı, iş şartları, ve eñ müim – nostrifikatsiya ceryanı.

Müim ki, teşebbüs gruppasınıñ bir qaç vekili YÖKke (Yükseköğretim Kurulu – Türkiyede diplomlarnı nostrifikatsiya etmek devlet müessisesi) vesiqalarını bermege başladı ve bu kişilerniñ bu meselede öz tecribesi bar.

Keçenlerde qırımtatar diasporasınıñ vekilleri yardımınen Meclisniñ azası Gayana Yüksel bu meselege bağışlanğan bir körüşüvni teşkil etti. 2022 senesi qara qış ayınıñ 10-unda YÖKniñ başı, professor, doktor Erol Uzvar, halqnıñ lideri Mustafa Cemilevniñ başlığınen ve Meclisniñ azası Gayana Yüksel, Mustafa Cemilevniñ mesleatçısı Lenus Mambet, “Qırım ailesi” İTniñ başı Anife Kurseitovadan ibaret olğan  qırımtatar halqınıñ delegatsiyasını qqabul etti. Körüşüvde nostrifikatsiuya ve qırımtatarlarnıñ ihtisas diplomlarını tanıma ceryanlarını sadeleştirüv imkânları muzakere etildi, çünki Türkiyeniñ tarihında başqa türk halqlarınen böyle vaqialar mevcuttır.

YÖKniñ Başı, doktor Erol Uzvarnen añlaşmağa mücibi, yaqın kelecekte YÖK bu mesele baqacaq.

Teşebbüs gruppası, qırımtatar halqınıñ vekillerini idare etüv işini yañıdan yaptı, maqbul malümat toplap işledi.

Qara qış ayınıñ 19-unda Meclisniñ azası Gayana Yüksel, Qırımtatar Milliy Meclisiniñ Başı Refat Çubarovğa bir mektüp, gruppanıñ iştirakçileriniñ hitabını, şu anda Türkiyede bulunğan ve YÖKte diplomlarnı tanınma ceryanını başlatmağa azır olğan mütehassıslar cedvelini  yolladı. 

Yaqın kelecekte YÖKniñ bu müim meselege cevabı beklenilir.