İşğalli makeme Rustem Kâmilevni 10 künge tevqif etti ve “rf ordusını itibardan tüşürgeni” içün para cezasını berdi

08 Noyabr 2024

Aqmescit şeeriniñ işğalli Kıyiv rayon makemesi advokat Rustem Kâmilevni on künge tevqif etti. Bundan ğayrı, uquq qorçalayıcığa 50 biñ ruble para cezasını berdi.

Rusiye uquq qorçalayıcıları Kâmilevge qarşı eki memuriy davanı tizdiler. Birincisi, RFnıñ Memuriy cinayetler qanunnamesiniñ 20.3 maddesiniñ 1-inci qısmına binaen Facebookta “Qırım birdemligi”niñ 2020 senesi faalci Oleh Prıhodko üzerinde makeme oturışı aqqında postınıñ repostı sebebinden tizildi. 

Ekincisi protokol ise RFnıñ Memuriy cinayetler qanunnamesiniñ 20.3.3 maddesiniñ 1-inci qısmına binaen Kâmilevni “rf ordusını itibardan tüşürgeni” içün qabaatlap, Suriye ve Ukrainadaki vaqialar aqqında postlarnıñ repostı sebebinden tizildi. Şu post 2017 senesi yazılğan.