İşğalciler ukrainalılarnıñ Qırımdaki 2 milliardğa mülküni “milliyleştirdiler”

11 Iyün 2024

İşğal etilgen Qırımda rus akimiyeti bildirdi ki, Ukraina vatandaşlarınıñ 2,1 mlrd rublege mülkü “milliyleştirildi”. Qırımnıñ rus parlamentiniñ başı Vladimir Konstantinov “RİA Novosti”ge bu aqqında haber berdi, dep Qırım.Aqiqat bildirdi.

Qırımnıñ rus parlamentiniñ başı añlattı ki, bu seneniñ soñuna qadar yarımadada RFnıñ kontrol etkeni akimiyet, ukrain vatandaşlarınıñ mülküni satıp, “çoq kelir almağa” ümüt ete, çünki “yahşı aktivlerni satmağa azırlanalar”.

Bozarğan aynıñ 8. künü Konstantinov bildirdi ki, işğalli akimiyet Ukraina vatandaşlarınıñ saip olğanı daa 110 obyektni “milliyleştirmege” istey. Onıñ sözlerine köre yırcı Jamala, eski Ukraina baş naziri, Qırım MCniñ eski iqtisadiyat naziri Arseniy Yatsenük, Ukraina Yuqarı Şurasınıñ eski mebusı Lidiya Kotelâk, iş adamı Vadım Vayspapirniñ mülkü cedvelge kirsetildi. Bundan ğayrı, ukrain siyasetçisi, Ukraina Yuqarı Şurasınıñ eski mebusı Vitaliy Homutınnık ve “Zelenskıynıñ Livadiyadaki başqa ukrain qomşuları”nıñ mülküni satmağa planlaştıralar.

Yarımadada RFnıñ kontrol etkeni akimiyet, başqa uquqiy şahıslarnıñ mülküni de “milliyleştirmege” planlaştıra: “Yalta kinostudiyası” ZAT Yaltadaki, “Musafirhane “Bristol” TOV, “Platınum bank” PAT, “Holding şirketi “Kıyivmiskbud”, Aluştadaki Yunus balığı terapiyası, reabilitatsiya ve raatlanuv merkezi.

Keçenlerde Qırımnıñ işğalli akmiyeti bildirdi ki, Ukraina vatandaşlarınıñ Qırımdaki “milliyleştirilgen” mülküni satıp, 1,7 mlrd ruble aldı.

2023 senesi ilk qış ayınıñ 29. künü Qırımnıñ işğalli parlamentiniñ başı Vladimir Konstantinov, Ukraina vatandaşlarınıñ Qırımdaki 2600 taşınılır ve taşınılmaz mülküni “milliyleştirgenleri”ni bildirdi. Şu cümleden, iş adamı İhor Kolomoyskıynıñ aktivleri, Qırımtatar Milliy Meclisiniñ evi ve Ukraina prezidentiniñ eşi Olena Zelenskanıñ daireleri satıldı.

Ukraina prezidentiniñ Qırım MCdeki Daimiy temsilcisi Tamila Taşeva bildirdi ki, Ukraina insan ya da devlet aqlarını bozğan aktlarnı tanımaycaq. Olar arasında mülkni “milliyleştirüv” ya da çıqaruv, miras qayd etüv aqqında qararlar.