İşğalciler siyasiy esir Yaşar Şıhametovnı şiddetli rejiminiñ 11 senesine maküm ettiler

09 Sentâbr 2022

Rostov-na-Donu şeeriniñ Cenüp bölge arbiy makemesinde ruslar, Aqyatdan qırımtatar aşçısı, siyasiy esir Yaşar Şıhametovge üküm çıqardılar – şiddetli rejimniñ 11 senesine maküm ettiler. Uquq qorçalayıcı Mumine Saliyeva Facebookta bu aqqında haberdar etti.

Saliyevanıñ sözlerine köre, davanıñ bilgilerine mücibi, qabaatlandırılğan adamnıñ silâsı, patlayıcı şeyi yoq edi. O, terrorizm bir aktını yapmağa planlaştırmay ve başqalarnı terrorizm aktını yapmağa mecbur etmey edi.

– Rusiye Federatsiyasınıñ konstitutsiya sistemasını yıqma ve akimiyetni elge keçirme olğanına dair iç bir delil yoq. Davanıñ bilgilerinde diniy ve siyasiy mevzulı muzakerelernen ses beyanatları bar. Aslında bu, teşkerilemegen gizli şaatlarnıñ ifadelerinen beraber davanıñ tek isbatıdır, – dep uquq qorçalayıcı qayd etti.

Yarım seneden daa çoq bir vaqıt devamında Yaşar Şıhametov çeşitli hastalıqlarnen taqiqatçı izolâtozında esip etile.

Keçenlerde Rostov-na-Donu şeeriniñ Cenüp bölge arbiy makemesinde Yaşar Şıhametovnıñ ‘Hizb-ut-Tahrir’ davasında makeme munaqaşaları bitirildi. Yüksek basım sebebinden soñ qabaatlandırılğan adam sözni aytamadı, acele yardımnıñ tibbiyetçileriniñ ziyaretine bile ihtiyacı bar edi. Şıhametovnıñ özüni yahşı duymağanı şikâyetlerine baqmadan makeme, qorunmanıñ teneffü berme talabını red etti. Acele yardımnıñ ekimleri Şıhametovğa hipertoniya diagnozı qoydılar.