İşğal makemesi Lütfiye Zudiyevağa Facebookta post yayınlağanı içün para cezasını berdi

19 Aprel 2024

İşğalciler qırım uquq qorçalayıcısı ve jurnalisti Lütfiye Zudiyevanıñ memuriy bozması aqqında dava baqıldı. Malümat azatlığı suistimalı sebebinden “makemeci” onı qabaatlı tanıdı ve 2000 ruble (837 grn) cezasına maküm etti. “Qırım birdemligi” ögrengeni kibi, “Hizb ut-Tahrir” davasınıñ “Qarasuvbazar gruppası”nıñ iştirakçilerinen bağlı işğalcilerniñ makeme oturışı aqqında postı sebebinden Zudiyevağa para cezasını berdiler.

Çiçek ayınıñ 19-ında “Qırım birdemligi” bu aqqında haber berdi.

2021 senesi qara qış ayında Facebookta Zudiyeva eki metinni yayınladı.

Birinci postınıñ tarihı qara qış ayınıñ 10-cı künü.

Ekincisini ise ertesi künü qara qış ayınıñ 12-ci künü Zudiyeva yanınladı.

“Qırımdaki Aşırıcılıqqa qarşılıq merkeziniñ işçileri qarar berdiler ki, Zudiyeva makeme qararınen yasaqlanğan ve Rusiyede terror birleşmeleriniñ tek federal cedveline kirsetilgen teşkilât aqqında malümat yayınaldı, amma bu teşkilâtnıñ yasaqlanğan statusını qayd etmedi. Yasaqlanğan teşkilâtlar siciline binaen “Hizb ut-Tahrir”niñ “Qarasuvbazar” gruppası ve postta qayd etilgen makeme davası degil, “Hizb ut-Tahrir” fırqası terror teşkilâtı olaraq tanındı”, — dep “Qırım birdemligi” bildirdi.

Advokat Nazım Şeyhmambetov qayd etti ki, qorçalayıcı taraf apellâtsiya şikâyetnamesini yollamağa azırlana. Bundan ğayrı, onıñ sözlerine köre, işğal makemesi qorçalayıcılarnıñ bergeni delillerge diqqat etmedi.