Herson vilâyetinde işğalciler “Noman Çelebicihan adına batalyon”da iştirak etkeni içün adamnı tuttılar

12 Mart 2024

Herson vilâyetiniñ vaqtınca işğal etilgen toprağındaki Geniçesk şeerinde rus quvetçileri, Rusiyede yasaqlanğan “Noman Çelebicihan adına qırımtatar göñülli batalyonında” sanki iştirak etken yerli sakinni tuttılar.

RF Taqiqat eyyetiniñ metbuat hızmeti Telegramda bu aqqında haber berdi. Olarnıñ bilgilerine köre, 2015 senesi ilk qış ayında 55 yaşındaki adam maqbul batalyonğa qoşuldı ve “halq ögünde narazılıq tedbirleri”nde faalca iştirak ete, “KHVda teşviqat malümatı”nı teşkilâ ete ve yerine ketire, “Qırımnıñ Rusiyeden zoraki usulnen azat etilmesini çağıra” edi.

RF CQniñ 208. maddesiniñ 2. qısmına (RFnıñ menfaatına qarşı olğan maqsatnen federal qanunlarda qayd etilmegen silâlı şekillendirüvde iştirak etüv) binaen tutulğan adamğa qarşı cinaiy dava açıldı.

“Adam, qanunsız silâlı şekillendirüvge çeşitli yardım ete ve anda iştirak etmeleri içün Geniçesk şeeriniñ sakinlerini saylay edi. Öz areketlerinen şübelengen adam, Rusiye vatandaşlarınıñ iqtisadiy ve siyasiy menfaatına zarar ketirdi ve Rusiye Federatsiyasınıñ milliy havfsızlığı içün telükeli vaziyet yarattı”, – dep bildirildi. 

Ukraina, Ukraina vatandaşınıñ tutulmasını resmen tefsir etmedi.