Meclis reisi Bulğaristandaki qırımtatar diasporasınen onlayn körüşüvni keçirdi

17 March 2025

Qırımtatar Milliy Meclisiniñ reisi Refat Çubarov Bulğaristanda yaşağan qırımtatar diasporasınıñ vekillerinen onlayn körüşüvni keçirdi. Körüşüvge Bütündünya qırımtatar kongressiniñ baş kâtibi Namık Kemal Bayar, “Emel” hayriye fondunıñ reisi Zafer Karatay ve “Ukrainanıñ diniy medeniyeti” cemaat teşkilâtınıñ reisi, “Qırımtatar studiyaları” leyhasınıñ müellifi ve reberi Valeriya Levkivska qoşuldılar.

Körüşüv devamında mayıs ayında Bulğaristanda açılacaq sergige azırlıq aqqında söz yürsetildi. Böylece, Valeriya Levkivska, “Qırımtatar studiyaları” leyhası endi üç yıldır bar olğanını aytıp berdi, bu vaqıt içinde Ukrainada üç sergi ve Bulğaristanda eki sergi keçirildi, bu sene ise mayısnıñ 22-nde Ruse şeerinde ve mayısnıñ 26-nda Tsarev-Brod köyünde eki tedbir planlaştırıla. Sergilerde Ukrainadan ketirilgen urba ve ev eşyaları, resimler, fotoresimler ve eksponatlar numayış etilecek.

“Leyhanıñ temeli qırımtatarlarnıñ er künlik ayatı, aman-aman unutılğan adet ve ananeleridir. Ukraina ve dünyanıñ qırımtatar medeniyeti aqqında bilgilerini ğayrıdan tiklemege ve terenleştirmege isteyim. Rusiyede sergi Bölge tarihiy müzeyinde keçirilecek, soñra ise büyük qırımtatar cemiyetiniñ yaşağanı Tsarev-Brod köyünde”, – dep Levkivska  tarif etti.

Qırımtatar cemiyetinen onlayn körüşüv, Bulğaristandaki Ukraina elçihanesi, Rustaki Ukraina konsullığı ve Qırımtatar Milliy Meclisiniñ desteginen keçirilecek tedbirlerge daa çoq insannı celp etmek içün teşkil etildi. Teşkilâtçılarnıñ qayd etkenine köre, sergi neticesinde üç tilli katalog derc etilecek. Bundan da ğayrı, tedbir çerçivesinde Tsarev-Brodda Bulğaristandaki qırımtatar diasporasınıñ şekillenüvi ve inkişafına bağışlanğan tögerek masa keçirilecek.

Qayd etkenine köre, Tsarev-Brod köyünde qırımtatarlar ve Osmanlı devrinen bağlı pek çoq tarihiy yer bar, şu cümleden planlaştırılğan tedbirlerden evel tamir etilecek eski çeşmeler bar.

“Biz Qırım cenkinden berli bu bölgede yaşağan qırımtatarlar mevzusını yañıdan aktualleştirmege ve hatırlatmağa isteymiz: “Biz barmız, unutılmadıq, biz ğururlanğan ve dünyağa köstermege istegen tarihımız bar”, – dedi Bahtişen Kaya.

Refat Çubarovnıñ qayd etkenine köre, bu kibi leyhalar em diaspora içindeki esnaslarnı faalleştirmek, em de çetelde Ukraina ve qırımtatarlar mevzusını daa yahşı añlamaq içün pek müimdir.

Neticesinde iştirakçiler mevcut meselelerni ve aktual suallerni muzakere etip, daa sıq onlayn körüşüvlerni keçirmege ve er sefer diaspora temsilcileri, Meclis azaları ve Bütündünya qırımtatar kongressiniñ vekillerini celp etmege añlaştılar. Böyle körüşüvler diger memleketlerniñ vekillerinen de planlaştırıla.