Eskender Bariiev Qırım platformasınıñ idare organını teşkil etmege çağırdı

28 Oktâbr 2024

Qırımtatar Milliy Meclisiniñ azası, Qırımtatar maaliy merkeziniñ idare reisi Eskender Bariiev Ukrainağa halqara destekni idare etmek içün Qırım platformasınıñ daimiy organını teşkil etmege çağırdı. Qırımtatar maaliy merkeziniñ Facebook saifesinde bu aqqında haber etildi.

Eskender Bariiev bildirdi ki, Qırımnı işğalden qurtaruvnıñ semereligi ardı-sıra adımlarğa, hususan yañı analitik aletlerniñ şekillenmesine ve faal haber işlerine bağlıdır.

Bariiev qayd etti ki, Qırım platformasınıñ institutsiyalaşması Ukrainanıñ ittifaqdaş memleketlerine onıñ teşebbüslerine daa faal qoşulmağa imkân berecek. O qayd etti ki, dünyanıñ pek çoq memleketi tarafından desteklengen platforma Ukrainanıñ bütünligi ve istilâcığa qarşı küreşte müim bir alet ola.

• Qırım platformasınıñ institutsiyalaştırılmaycağına qadar, işğalden azat etüv esnaslarında, ğalebe planı ve barışıq formulasınıñ amelge keçirilüv esnaslarında onıñ semereliligini arttırmaq içün daa muayyen adımlar atılmaycaq, – dep farqlı memleketlerniñ parlamentleriniñ areketlerini idare ete bilecek organnı teşkil etmek kerekligini qayd etip, Eskender Bariiev ayttı.

Onıñ aytqanına köre, Qırım platformasınıñ planlaştırılğan oturışınen beraber side-tedbirler de keçirildi, şu cümleden İşğal müzeyinde ötkerilgen ve başqa memleketlerniñ vekillerine 1944 senesiniñ facialı vaqialarını köstergen tedbir olıp keçti.

Bariiev qırımtatarlarnıñ sürgünligini Latviya tarafından resmen ilk tanınğan genotsid olaraq hatırlattı ve başqa memleketlerni de bunıñ kibi cinayetlerniñ tekrarlanmasını toqtatmaq içün aynısını yapmağa çağırdı.