Epis etilgen Ruslan Asanovnıñ apayına aqayınen SİZOda körüşmege red ettiler

11 Sentâbr 2023

Bağçasaraydan kelgen ve arman ayınıñ 24-ünde tevqif etilgen faalci Ruslan Asanovnıñ apayı, Aqmescitteki 2. SİZOda aqayınen qısqa şekilde körüşme ricasına red cevabını aldı. Zera Mustafayeva bu aqqında “Qırım birdemligine” añlattı, dep Qırım.Aqiqat haber berdi.

Aqrabaları, Rusiye FSBniñ taqiqat bölüginiñ soñ derecede müim işler meseleleri üyken taqiqatçısın Vitaliy Vlasovdan cevap aldılar. Ruslan Asanovnıñ apayına mektüpte bildirdiler ki, “körüşüv izni berüv ricası baqıldı ve tamamınen red etme qararı berildi”.

Qayd etildi ki, Qırımnıñ Bağçasaray rayonındaki tintüvlerden soñ adamnı eki ayğa tevqif ettiler, amma Aqmescitteki 2. SİZOda onı flüsnen – tezce progress etken irinli tiş hastalığınen ketirildi. Zera Mustafayevanıñ izolâtorda oña ilâçlarnı berme niyeti bar edi.

“Men ağrı yoq etici antibiotiklerni ketirdim, amma ketirgenim bütün ilâçlardan tek “Nimesil” aldılar. Tibbiyet hızmetçisi ayttı ki, olarnıñ aphanesinde er şey bar”, – dep Zera Mustafayeva añlattı.

Arman ayınıñ 24-ünde Qırımnıñ Bağçasaray şeeri ve Bağçasaray rayonında quvetçileri Ruslan Asanov, Seydamet Mustafayev, Remzi Nimetulayev, Abdulmecit Seitumerov, Amethan Umerov ve Eldar Yakubovnıñ evlerini tinttiler. Bundan soñ olarnı Aqmescitteki RF FSB binasına ketirdiler.

Aynı kün tutulğan adamlarnı destek etmek içün RFnıñ kontrol etkeni Aqmescitteki Kıyiv rayon makemesi ögünde qırımtatarlar toplandılar. Rus quvetçileri, kelgen insanlarnı da tuttılar, neticesinde olardan eñ az 20-sine memuriy tevqifler berildi – 1-7 kün.