Duşmannen işdeşlik yapqan Talipov sebebinden qırımtatar Dlâver Salimov müstemlekege apis etile bilir

08 Aprel 2024

Qırımtatar Dlâver Salimovnıñ davası çerçivesinde “prokuror”, onı müstemlekede 2,6 senege maküm etmege soradı. Duşmannen işdeşlik yapqan bloger Talipovnıñ Telegram kanalı içün halq ögünde afu soramağa red etken soñ adam tevqif etildi.

Qırım uquq qorçalayıcı gruppasınıñ haber bergenine köre, Aqmescitteki “İslâm Terek rayon makemesi”niñ makemecisi Tsertsvadze Ğeorğiy Davıdovıç Salimovnıñ davasını baqa.

2023 senesi Eski Qırım şeerinde qırımtatar Dlâver Salimov, başqa sakinnen laf etkende insannıñ “Z temsilinen kepkanı kiygeninden açuvlandı. Bu vaqianıñ videosu çıqarıldı ve duşmannen işdeşlik yapqan bloger Oleksandr Talipovnıñ “Qırım SMERŞi” ve “TalipoV Online” eki teşviqat Telegram kanalında yayınlandı.

Video astında Salimovnıñtolu adı ve ceza bermege qorqutmaları yazıldı. Video yayınlanğan soñ RF MBQniñ 20.1. maddesiniñ 1. qısmına (kiçik yaramazlıq) binaen Salimovğa qarşı memuriy dava açıldı. Şu kün RF MBQniñ 6.9. maddesiniñ 1. qısmına binaen Aqmescitteki “barışıq makemesi” Salimovğa 4000 rublelik para cezasını berdi.

Bundan ğayrı, 2023 senesi arman ayınıñ 16-sında Aqmescitteki “İslâm Terek rayon makemesi”niñ “makemecisi” Bodenko Anastasiya, RF MBQniñ 20.1. maddesiniñ 1. qısmına (kiçik yaramazlıq) binaen Salimovnı 14 künge apis etmege üküm çıqardı.

Aynı zamanda RF quvet müessiseleriniñ vekilleri, Salimovdan afusınen “Qırım smeşi” ve “TalipoV Online” Telegram kanalında yayınanacaq olğan videonı çıqarmağa söz şeklinde talap ettiler

Dlâver Salimov halq ögünde afu soramağa red etken soñ 2023 senesi arman ayınıñ 23-ünde RF CQniñ 119. maddesiniñ 1. qısmına (öldürmege qorqutuv) binaen oña qarşı cinaiy dava açıldı.Quvetçiler, Salimovnıñ video çıqarması içün daa bir kere qorquttılar, o ise red etti. Bundan soñ qabaatını çoqlaştırdılar ve apis ettiler.

2023 senesi boş aynıñ 1-inde onıñ areketleri, RF CQniñ 119. maddesiniñ 2. qısmına deñiştirdiler ve endi 2023 senesi boş aynıñ 2-sinde Aqmescitteki 1. SİZOda apis etildi.

2023 senesi boş aynıñ 2-sinde Aqmescitteki “İslâm Terek rayon makemesi”niñ “makemecisi” Bodenko Anastasiya, Salimovnı 52 künge yani 2023 senesi ilk qış ayınıñ 23-üne qadar apis etmege qarar berdi. Birazdan tevqif müddeti deñişti.

Salimovnıñ taqip olğanı maddege köre o beş senege maküm etile bilir.