«Boş kürsüler»: Kıyivde siyasiy mabüslerge qoltutuv aktsiyası

16 Noyabr 2024

_{Foto: PEN Ukraine}

Ukrainağa qarşı cenk sebebinden habersiz ğayıp olğan, apis etilgen ya da esirlikte bulunğan jurnalistler, yazıcılar, medeniyet erbapları ve uquq qorçalayıcılarğa qoltutumaq içün “Boş kürsüler” aktsiyası Kıyivde olıp keçti.

Boş aynıñ 15-nde Dünya apis etilgen yazıcılar kününi, ya da Boş kürsü kününi qayd ete.

Kıyivdeki Sofiya meydanında uquq qorçalayıcı tedbirni Ukrain PEN ve Vatandaş serbestligi merkezi teşkil etti. Tedbir vaqtında, 2014 senesinden berli devam etken Rusiye istilâsı sebebinden biznen bedeniy şekilde bulunıp olamağan esir alınğan, tevqif etilgen ve habersiz ğayıp olğan müellif, media hadimleri, sanatçılar ve uquq qorçalayıcılarnıñ adlarınen boş kürsülerden timsaliy bir qurulış yapıldı.

— O vaqıt kürsülerde Nariman Celâl ve Lüdmıla Ğuseynovanıñ adları bar edi. Olar endi azat etildi. Ve bu, ilânnıñ siyasiy mabüslerniñ azat etilmesine yardım etkenini isbatlay. Grajdan mabüslerniñ sayısı, eñ azından 7 biñge yaqın, — dep aktsiya teşkilâtçısı Maksım Sıtnikov bildirdi.

Tedbirge esirlikte bulunğan, apiske alınğan ya da habersiz ğayıp olğan müellif ve ressamlarnıñ tuvğanları, dostları ve zenaatdaşları, yazıcılar, jurnalistler, uquq qorçalayıcılar qoşuldılar. Öz yerini sabıq siyasiy mabüs, Qırımtatar Milliy Meclisiniñ reisiniñ birinci muavini Nariman Celâl aldı.

— Er bir siyasiy mabüsniñ ya da esirniñ pencere tışında öz manzarası bar, bazı vaqıtları öyle de olmay, çünki apishanede pencere yoq. Esirler tışqı dünya eşitilmegen ya da temiz ava duyulmağan yerastı odalarda tutula. Apishanede olğanda, ayatnıñ diqqat merkezi pek qısqartıla. Nezaretçiler, insannıñ iç bir kerçek malümatqa irişmemesini tırışalar, — dep ayttı Nariman Celâl. — Amma öyle ola ki, bizim istegimizniñ küçü ve insanğa bir şey yetkizecek istegimiz, Rusiye lagerleri ve apishaneleriniñ metrlik qalınlıqta olğan divarlarından keçe. Bunı yapmaq pek müimdir. Apishanede bulunğanda, siziñ aqqıñızda er şey hatırlana ve er keske siziñ aqqıñızda hatırlatıla, yardım ete ve siziñ tutaşqan ince ışıq telleriñiznen sızıla. Seni çıqış yoluna alıp barğan bir tel ile”.

Nariman soñunace şunı da qoştı: “Biz toplaşmaq, toqtatmamaq, diqqatlı olmaq ve muhtac olğanlarğa yardım etmek isteymiz. “Boş kürsüler” kibi tedbirler tek apishanelerde yaşağanlarğa ve olarnıñ qorantalarına qol tutmaq içün yapılmay. Bu cemiyetimiz içün bir sınavdır, azatlığımız içün alıp barğan cenkimiz bizni merametli, qayğırıcı, maqsatqa irişe bilgen insanlar olaraq qaldıra”.

Kürsülerniñ bir qısmında “Adı belli degil” levhaları bar edi, çünki mabüs, esir alınğan ve habersiz ğayıp olğan ukrainlerniñ adları belli degil.