Barışıqlı işğalden azat etüv olmaz – Cemilev Qırımnı işğalden azat etüv

22 Noyabr 2022

_{Foto: Dmıtro Halko/Hrani.Ru}

Qırımnı barışıq olaraq işğalden azat etüv ceryanı olmaz, dep Herson şeerinde “Hrani”ge qırımtatar halqınıñ milliy lideri ve Yuqarı Şuranıñ mebusı Mustafa Cemilev bildirdi.

– Fevral ayınıñ 24-ünden yani rusiyeniñ tolu miqyaslı tecavuzından soñ Ukraina milliy telükesizlik ve mudafaa şurası qarar berdi ki, Qırım silâsız tarzda azat etilecektir. Amma rusiyeniñ yapqanı şeylerden soñ, rusiyeniñ şimdiki nazar noqtasına ve başqa topraqlarımıznı zapt etkenine köre, mezkür müessise barışıq işğalden azat etüv ceryanını destek etmey. Men tüşünem ki, bunı yapmaq içün barışıq usulları endi qalmadı, – dep Cemilev ayttı.

Cemilev qayd etti ki, Ğarpta “bazı siyasetçiler şunı aytalar: rusiyege Qırımnı bereyik”. Onıñ sözlerine köre, “bu basir olmağan bir siyaset ve bu, tecavuzcını rağbetlendirüv, yani halqara uquqnıñ manası olmay”.