Aqmescitteki yañı SİZOda 86 tutulğan ukrain vatandaşı qapatıldı

22 Aprel 2024

Rusiye tarafından yañı işğal etilgen topraqlarda, Herson ve Zaporijjâ vilâyetlerinde tutulğan eñ az 86 ukrainalı, cinaiy dava açılmadan işğal etilgen Qırımnıñ Aqmescit şeerindeki 2. SİZOda qapatıldı.

Telegramda “Qırım ketişatı” uquq qorçalayıcı teşkilâtı bu aqqında haber berdi.

Olarnıñ bilgilerine köre, bu izolâtorda da qapatılğan deyerli 30 insan, ayrıca “casuslıq”ta qabaatlandı. Olar arasında, eki senedir 2. SİZOda apis etilgen Hersondan faalci İrına Ğorobtsova.

“İrına Ğorobtsova kibi uzun zaman status almadan eñ az 27 insan SİZOda bulunğanda casuslıq, diversiyalar, terror aktlatını azırlamaqta qabaatlandı”, — dep bildirildi.

Aqmescitteki 2. SİZOda qapatılğan ukrainalılar aqqında ne bilemiz:

2023 senesi qara qış ayında Qırım uquq qorçalayıcı gruppasınıñ idarecisi Olha Skrıpnık haber bergeni kibi 2022 senesiniñ soñunda Aqmescitteki 2. SİZOda Herson ve Zaporijjâ vilâyetlerinde tutulğan tahminen 110 insan buluna edi. Birinciden olarnı azaplağan soñ mahsus teşkil etilgen ve tamamınen FSB tarafından idare etilgen Aqmescitteki 2. SİZOğa alıp ketirdiler. Bundan ğayrı, izolâtorda cinaiy dava açılmadan ukrainalılar bulunalar, bunıñ sebebinden olarğa advokatlarnı yibermeyler.

2024 senesi kiçik ayda Qırım uquq qorçalayıcı gruppası haber berdi ki, 2023 senesiniñ soñunda Ukrainanıñ yañı işğal etilgen topraqlarında tutulğan 60 ukrain vatandaşı Aqmescitteki 2. SİZOdan Rusiyege ketirildi.