Ağır hasta olğan siyasiy mabüs Amet Süleymanov yürek klapanını deñiştirüv nevbetinde yoq

01 Noyabr 2024

Rusiye işğalli akimiyeti Amet Süleymanovğa ameliyat keçirmege aşıqmaylar. İşğal etilgen Qırımnıñ Sağlıq nazirligi, siyasiy mabüsniñ yürek klapanını deñiştirmek içün nevbette olmağanını onıñ ömür arqadaşına bildirdi.

Bunı “Qırım birdemligi” bildirdi.

Amet Süleymanovnıñ ömür arqadaşı berim ayınıñ başında Rusiye kontrolindeki Qırım Sağlıq nazirligine muracaat yolladı. Lilâ Lümanova aqayınıñ ameliyat nevbetinde bulunğan yerini bilmek istedi. Onıñ aytqanına köre, Amet Süleymanovnı 2021 senesiniñ soñunda qayd ettiler.

Orta küz ayınıñ 21-nde Lilâ Lümanovağa Ametniñ “ameliyatı aqqında qarar alması ve baqılması içün vesiqalarnen şahsen kelmesi” aqqında cevap keldi.

“Onı nevbetten çıqarğanlarını añlaşılır oldı”, – dedi qadın.

O, “Qırım prokuraturası”na şikâyet yazıp, aqayınıñ ne sebepten beklev cedvelinde olğanını ve nazirlikniñ cevabı ne içün 30 künden çoq vaqıt beklegenini ögrenmege talap etti.

“Men pek şaşırdım ve qorqtım. Nevbetke kirgen soñ, maña bir qaç raqamlı kod berdiler ve onıñ yerini onlayn teşkermek mümkün olğanını ayttılar. Amma sistemadaki meseleler sebebinden bunı yapıp olamadılar. Tek onıñ ameliyattan nevbette turğanı yazılğan edi”, – dep tarif etti Lilâ Lümanova.

2022 senesi berim-orta küs aylarında aynı “sağlıq nazirligi”nden oña telefon etip, onıñ nevbeti ameliyatqa kelişkenini ve yılnıñ soñuna qadar oña muracaat eteceklerini ayttılar. Amet Sülieymanov Cenübiy bögle arbiy makemesinden izin aldı, teşkerüvge çıqtı.

“Yılnıñ soñuna qadar telefon etmediler. Kiçik-saban aylarında Sağlıq nazirligine telefon etip, ameliyat olıp-olmaycağını soradım. Bizge dediler ki: “Ebet, bu cedvelde bar, amma siz ameliyattan vazgeçtiñiz”. Bizler, belki de, bir añlaşılmamazlıq oldı, dep tüşündik. Belki de birisi bizim yerimizden cevap berdi. Ve emin edik ki, daa bekleycekmiz. Amma çiçek ayında onı alıp kettiler”, – dep tarif etti Lümanova.

Keçken sene arman ayında o, aqayınıñ yanına barıp, “Volodımır merkezi”nde ekimlernen bir klapan deñiştirilmesini muzakere etti. Olarnıñ aytqanına köre, ameliyat içün muracaat Moskovağa yollanıldı, amma onıñ baqılması aqqında bir şey aytılmadı.