Meclis Reisi Ukrayina çetel diplomatik müessiseleriniñ reberleriniñ er yıllıq toplaşuvında iştirak etti

04.08.2026

Ukrayina Tış işler naziri Andriy Sıbiğanıñ davetinen 2026 senesi arman ayınıñ 3-nde Qırımtatar Milliy Meclisiniñ Reisi Refat Çubarov Ukrayina tış diplomatik müessiseleriniñ reberleriniñ yıllıq toplaşuvında iştirak etti.

Tedbir çerçivesinde Refat Çubarov Fevqulâde ve Vekâletli Ukrayina elçileri ve halqara teşkilâtlar yanındaki daimiy Ukrayina temsilcilerinen qonuştı. Körüşüvler vaqtınca işğal etilgen Qırım, Ukrayinağa halqara destek ve diplomatik temsilciliklerniñ Qırımtatar Milliy Meclisinen işbirlik ile bağlı aktual meseleler muzakere etildi.

Ukrayina Prezidenti Volodımır Zelenskıy diplomatik korpus ögünde çıqışta bulunıp, devletniñ Qırımnı işğalden azat etüv ve halqara Qırım platformasınıñ inkişafı meselesine deñişmegen diqqatını qayd etti.

“Qırım platformasınıñ parlament ölçüsiniñ inkişafı ve işi içün minnetdarmız. Biz Qırımnı unutmaymız, bunı bilmeñizni isteyim. Unutmaymız, afu etmeymiz. Unutmaycaqmız. Ve bu sebepten Qırım platforması bar. Onıñ içün er yıl bunı liderler seviyesinde ve parlament seviyesinde keçirecekmiz”, – dep qayd etti Ukrayina Prezidenti.

Devlet yolbaşçısı şunı da bildirdi ki, bu sene Qırım platformasınıñ iştirakçileri olğan devlet ve ükümet yolbaşçılarınıñ sammiti New Yorkta keçirilecek.

Ukrayina Yuqarı Şurasınıñ Reisi Ruslan Stefançuknıñ iştirakinen keçirilgen umumiy toplaşuvda Ukrayina Tış işler naziri Andriy Sıbiğa 1944 senesi qırımtatar halqınıñ sürgünliginiñ genotsid aktı olaraq tanılması boyunca çetel devletlerniñ parlamentlerinen ukrayin diplomatik temsilcilikleriniñ işini devam ettirmek müimligini qayd etti.

Aynı zamanda Ukrayina Yuqarı Şurasınıñ Reisi Ruslan Stefançuk, Qırım platformasınıñ parlament ölçüsi meselesini izaatlap, Qırımtatar Milliy Meclisiniñ, em de Ukrayina halq mebusları Mustafa Cemilev, Ahtem Çiygöz ve Tamla Taşevanıñ Qırımnıñ işğalden azat etilmesi ve qırımtatar halqınıñ aq-uquqlarını halqara seviyede qorçalav mevzularınıñ ilerilemesi içün yapqanları isseni yüksek qıymetlendirdi.

Refat Çubarov ukrayin diplomatlarına Qırımtatar Milliy Meclisinen işbirligi içün teşekkür bildirdi ve Qırımnıñ işğalden azat etilmesi, tamır qırımtatar halqınıñ aq-uquqlarınıñ qoruvı ve ukrayin siyasiy mabüsleriniñ azat etilmesi içün halqara ğayretlerni daa da birleştirmek müimligini qayd etti.