Türkiyede qırımtatarlarğa destek köstermek içün iş gruppası teşkil etildi

23.07.2026

Kırım Türkleri Kültür ve Yardımlaşma Derneği Genel Merkezi yanında Rusiye istilâsı sebebinden vaqtınca işğal etilgen Qırımnı ya da Ukrayinanıñ diger bölgelerini terk etmege mecbur olğan ve şimdi Türkiyede yaşağan Ukrayina vatandaşları olğan qırımtatarlar meselelerini baqacaq daimiy İçtimaiy-iqtisadiy iş gruppası teşkil etildi.

Teşebbüs Qırımtatar Milliy Meclisi, Kırım Türkleri Kültür ve Yardımlaşma Derneği Genel Merkezi ve farqlı sebeplerden Qırımnıñ Rusiye işğalinen bağlı olğan, Türkiyege vaqtınca köçmege mecbur olğan Qırımtatar cemiyetiniñ temsilcileriniñ umumiy işiniñ neticesi oldı.

İş gruppasınıñ teşkil etilmesine iş qıdırğanda, vesiqalarnı resmiyleştirgende, mesken kiralağanda, balalar içün tibbiy hızmet ve tasil alğanda qıyınlıqlar körgen semetdeşlerimizniñ Qırımtatar Milliy Meclisine muracaatları sebep oldı. Türkiye akimiyeti qırımtatarlar içün mahsus destek mehanizmlerini kirsetkenine baqmadan (bütün imtiyazlarnen Türk soylu statusını berüv), kerçekten de insanlar berilgen aqlarınıñ amelge keçirilmesini qıyınlaştıracaq bürokratik ve memuriy manialarnen rastkeleler.

Yañı teşkil etilgen iş gruppasınıñ terkibine Kırım Türkleri Kültür ve Yardımlaşma Derneği Genel Merkezi, Qırımtatar Milliy Meclisi ve yaqından Türkiyede yaşağan qırımtatarlar kirdiler.

İş gruppası eñ çoq rastkelgen meselelerni belgileycek, olarnı çezmek içün ameliy yollar qıdıracaq ve cemaatnen Türkiye devlet institutları arasında işbirlikni idare etecek. Siyasiy ya da devletlerara çezilüvini talap etken meseleler peyda olsa, olar Qırımtatar Milliy Meclisi baqması içün berilecek.

Rusiye istilâsı sebebinden Türkiyede vaqtınca köçmege mecbur olğan qırımtatarlarğa daa semereli destek köstermek ve işğalden azat etilecek Qırımğa qaytıp olamağanına qadar olarnıñ içtimaiy-iqtisadiy meseleleriniñ çezilüvine yardım etmek maqsadınen böyle bir platforma teşkil etildi.

İş gruppasınıñ terkibi ve baqacaq meselelerinen Kırım Türkleri Kültür ve Yardımlaşma Derneği Genel Merkeziniñ saytında tanış olmaq mümkün.