Kıyivde Türkiyede demokratiya oğrunda küreşkende elâk olğanlarnıñ hatırasını ürmetnen añdılar

15.07.2026

2026 senesi oraq ayınıñ 15-nde, Türkiye Cumhuriyetinde ükümet avdarması ıntıluvınıñ onuncı yıllığında, Kıyivde Türkiye ve qırımtatar cemaatınıñ vekilleri, dimpomatlar ve Türkiyeniñ ukrayin dostlarınıñ iştirakinen añma tedbiri olıp keçti.

Merasim M.M. Ğrışko adına Milliy nebatat bağçası toprağında Türk işbirligi ve Koordinasyon Ajansı (TİKA) tarafından qurulğan Türkiye-Ukrayina dostluğı ve demokratiya parkında olıp keçti.

Tedbir iştirakçileri 2016 senesi oraq ayınıñ 15-nde Türkiyemiñ milliy suvereniteti, demokratiya ve anayasa qurumını qorçalağanda canlarını feda etkenlerniñ hatırasını ürmetnen añdılar.

Tedbirge Qırımtatar Milliy Meclisiniñ Reisi Refat Çubarov, Qırımtatar Milliy Meclisiniñ azaları Riza Şevkiyev ve Gayana Yüksel qatnadılar.

Merasim vaqtında iştirakçiler Türkiyeniñ demokratik qıymetleri ve devletçiligini qorçalağan er kesni minnetdarlıqnen hatırladılar, elâk olğanlarnıñ hatırasını ürmetnen añdılar, avdarma ıntıluvına qarşı çıqıp turğan veteranlar ve vatandaşlarğa ürmet kösterdiler. 

Tedbir iştirakçileri demokratiya, serbestlik ve halqlarnıñ öz kelecegini belgilemek aqqını qorçalamaq kerekligini ve Ukrayina-Türkiye dostluğı ve işbirliginiñ müimligini qayd ettiler.