Alim Abduramanovğa Ukrayina Qahramanı unvanı berildi

07.05.2026

Ukrayina Prezidenti Volodımır Zelenskıy qırımtatarğa, kiçik serjant Alim Abduramanovğa “Altın Yıldız” ordeninen Ukrayina Qahramanı unvanını berdi – şahsiy cesaret, qaramanlıq ve ukrayin halqına fedakâr hızmeti içün.

Alim Abduramanov Rusiye tecavuzınıñ birinci yıllarından başlap Ukrayinanı qorçalay. 2015 senesi daa ATOda iştirak etti ve RFnıñ tolu miqyaslı istilâsı başlanğan soñ, işğalden çıqıp, öz isteginen Ukrayina ordusı saflarına qayttı. Asker 95-nci ayrı ava-desant ücüm brigadasınıñ terkibinde hızmet etip, cebeniñ eñ havflı yerlerinde cenk vazifelerini becere edi. 2022 senesi boş ayda rusiye işğalcilerinen küreş vaqtında Alim Abduramanov ağır yaralandı. Tedaviylengen, protezler qoyulğan, uzun müddetli reabilitatsiyadan soñ öz arbiy bölügine qaytmaqta israr ete ve hızmetini devam ete. Şimdi 31 yaşındaki kiçik serjant Alim Abduramanov istihbarat rotasınıñ baş serjantı vazifesini becere.

Qırımtatar Milliy Meclisiniñ Reisi Refat Çubarov yüksek devlet mukâfatınıñ berilmesini tefsir eterek, prezident fermanınıñ cesür ukrayin askerini tasvirlegen er bir sözü onıñ ömür yolu ve Ukrayinağa yapqan hızmetine tolusınen kelişkenini ayrıca qayd etti.

Qırımtatar Milliy Meclisi Alim Abduramanovnı Ukrayina Qahramanı unvanı ve ‘’Altın Yıldız’’ ordeni berilgeninen samimiy şekilde hayırlay. Bu mukâfat askerniñ şahsiy qahramanlığınıñ, ağır yaralanğan soñ bile Ukrayina devletine olğan yeñilmezliginiñ ve sadıqlığınıñ tanılmasıdır.

Qırımtatar halqı içün bu vaqia ayrı bir mana taşıy. Alim Abduramanovnıñ ikâyesi qırımtatarlarnıñ Ukrayinanıñ serbestligi ve tuvğan Qırımınıñ kelecegi oğrunda cesaret, namus ve yeñilmez küreşiniñ timsalidir. Qırımtatar askeri Ukrayinanıñ eñ yüksek dereceli devlet mukâfatınen şereflemek de qırımtatar halqınıñ Rusiye tecavuzına qarşı turuv ve Qırımnıñ işğalden azat etilmesi oğrunda küreşke qoşqan müim issesiniñ delilidir.

Bundan ğayrı, qırımtatarlar arasında Ukrayina Qahramanı unvanı Mustafa Cemilevge berildi. Qırımda rusiye işğalcileri tarafından öldürilgen Reşat Ametov, Pokrovsk civarında elâk olğan Dilâver Seithaliliyevge de ölgen soñ Ukrayina Qahramanı unvanı berildi.