Sürgünlikniñ 82 yıllığına Ankarada qırımtatar halqınıñ genotsid fedalarınıñ hatırasını ürmetnen añdılar

19.05.2026

Ankarada 1944 senesi mayısnıñ 18-de qırımtatar halqınıñ sürgünlik fedalarınıñ hatırasını ürmetnen añmaq içün qırımtatar halqınıñ genotsidi ve sürgünliginiñ 82 yıllığına bağışlanğan hatıra tedbirleri olıp keçti. Tedbirlerde Qırımtatar Milliy Meclisiniñ azası Gayana Yüksel ve Türkiyedeki Ukrayina elçisi Nariman Celâl, em de Türkiyedeki qırımtatar diasporasınıñ çoq vekili, cemaat erbapları ve jurnalistler iştirak ettiler.

Mayısnıñ 16-da Ankaranıñ merkezinde Ulus meydanında Türkiyedeki qırımtatarlarnıñ medeniyet ve yardımlaşuv birligi tarafından teşkil etilgen miting-rekviyem olıp keçti. Tedbir devamında Nariman Celâl, sovet rejiminiñ cinayetiniñ fedalarınıñ hatırası iç bir vaqıt unutılmaycağını ve Ukrayinanıñ topraq bütünligini ğayrıdan tiklemek ve tamır qırımtatar halqınıñ aqlarını qorçalamaq içün küreş devam etecegini qayd etti. Elçi, Ukrayinağa qol tutqanı içün qırımtatar diasporasına ve Türkiye cemiyetine minnetdarlığını bildirdi.

Tedbir vaqtında Gayana Yüksel Qırımtatar Milliy Meclisi adından çıqışta bulundı. Öz çıqışında o qayd etti ki, qırımtatar halqınıñ sürgünligi tek tarihiy ve uquqiy degil de, insaniy qıymet kesilmesini talap ete, çünki bu halqnı, onıñ medeniyetini, tilini ve Vatanınen bağını yoq etmek maqsadınen yapılğan ıntıluv edi.

O şunı da qayd etti ki, bugünde-bugün, Ukrayinağa qarşı Rusiyeniñ tolu miqyaslı istilâsı şaraitinde, qırımtatar halqınıñ tarihı hususan aktuaş olıp qala, qırımtatarlar ve ukrayinlerniñ ise totalitarlıq, repressiyalar ve imperiya siyasetine qarşı küreşniñ umumiy tecribesi bar.

Mayısnıñ 17-de Türkiyedeki Qırımtatarlarnıñ Medeniyet ve yardımlaşma birliginiñ Merkeziy ofisinde sürgünlik fedaları içün hatıra merasimi ve dua keçirildi. İştirakçiler Quran-ı Kerimni oqup ve dua etip, elâk olğanlarnıñ hatırasını ürmetnen añdılar. Bundan soñ, iştirakçiler qırımtatar halqınıñ hatıra, keder ve qaviyliginiñ timsali olaraq “Öz qalbiñde çıqar yaq” aktsiyasına qoşuldılar.

Mayısnıñ 18-de Türkiyedeki Ukraina Elçihanesinde diplomatik korpus ve çetel elçilerniñ iştiraki ile hatıra tedbiri keçirildi. Aynı şu künü Ankara Kent Konseyi’nde Türkiyedeki Qırımtatarlarnıñ medeniyet ve yardımlaşma birliginiñ “Cıyın”  ansamblinen beraberlikte Türkiyedeki Ukrayina Elçiligi tarafından teşkil etilgen teatrleştirilgen çıqış olıp keçti.

Bütün hatıra tedbirleriniñ iştirakçileri 1944 senesiniñ faciası aqqında tarihiy hatıra saqlanılmasınıñ ve Qırımnıñ işğalden azat etilmesi, qırımtatar halqınıñ aqları ve adaletniñ tiklenmesi oğrunda küreşni devam etmek müimligini qayd ettiler.