Menü 
Kıyivde Qırımtatar milliy bayrağı kününi ve Qırımtatar halqınıñ Ekinci Qurultayınıñ 35 yıllığını qayd etecekler
19.06.2026
2026 senesi ilk yaz ayınıñ 26-nda saat 16:00-da Ukrayina halq mimarlığı ve turmuşınıñ milliy müzeyinde Qırımtatar milliy bayrağı künü qayd etilecek.
Bu yılki vaqia, Qırımtatar halqınıñ Ekinci Qurultayı çalışıp başlağanından 35 yıl keçkeninden sebep, hususiy emiyetke saiptir. Bu tarihiy vaqia, sürgünlik ve Vatanğa qaytmaq içün küreşten soñ qırımtatarlarnıñ milliy öz idaresini ğayrıdan tiklev yolunda müim bir adım oldı.
Ekinci Qurultay işiniñ başlanuvı munasebetinen 2010 senesi Qırımtatar Milliy Qurultayınıñ qararınen ilk yaz ayınıñ 26-sı Qırımtatar milliy bayrağı künü olaraq ilân etildi. O vaqıttan berli er yıl bu kün dünyanıñ çeşit memleketlerindeki qırımtatarlarnı birlik, itibar, qaviylik ve tuvğan topraqnen bağ timsali olğan mavı ve altın tamğalı bayraq etrafında birleştire.
Qırımnıñ vaqtınca Rusiye işğali şaraitinde qırımtatar milliy bayrağı ukrayin yarımadasınıñ işğalden qurtarıluvı, tamır qırımtatar halqınıñ aqlarını qoruv ve milliy kimliginiñ saqlanuvı oğrunda küreşniñ timsallerinden biri oldı.
Bu sene bayramnıñ hususiy bir adeti, Ukrayina halq mimarlığı ve turmuşınıñ milliy müzeyi toprağında “Qırımtatar çiftligi” müzey ekspozitsiyasınıñ birinci binasınıñ açılış merasimi olacaq.
“Qırımtatar çiftligi” leyhası, Ukrayina tamır halqı olaraq qırımtatar halqınıñ medeniy mirasına bağışlanğan daimiy müzey meydanınıñ teşkil etilmesini közde tuta. Birinci obyekt, tarihiy tedqiqler ve arhiv materialları esasında Qarasuvbazar rayonınıñ Bağça Eli çöl köyünden ananeviy qırımtatar meskeniniñ ğayrıdan yaratılması olacaq.
Merasim çerçivesinde istegen er insan kelecekte çiftlikniñ qurulışında iştirak etip, qırımtatar eviniñ temel taşını qoya bilir.
Bayram programması devlet akimiyet organları, Qırımtatar Milliy Meclisi, cemaat erbapları ve qırımtatar cemiyetiniñ vekilleri iştirak etken tantanalı qısımnı, em de belli qırımtatar icracıları ve icadiy taqımlarınıñ iştirakinen bayram kontsertini teşkil etecek.
Musafirler ögünde Üsein Bekirov, Emiliya Bodurova, Şevket Zmorka, Ernes Osmanov ve Meryem Mambetovanıñ kvinteti çıqışta bulunacaq.
Bundan ğayrı, ziyaretçilerni ananeviy zenaat esnasları boyunca ustalıq dersleri, halq ustalarınıñ eserleri yarmalığı, balalar içün interaktiv programma, qırımtatar yemekleri, ananeviy qave ve milliy yemeklerniñ taqdim etilmesi bekley.
Tedbir Kıyiv şeeriniñ Akademik Trönka soqağı 1, Ukrayina halq mimarlığı ve turmuşınıñ milliy müzeyi adresinde olacaq.
Müzeyge kiriş içün teşkilâtçılar, er bir ziyaretçiden, er bir aile azası ya da 6 yaştan büyük gruppa içün ayrı qayd etüv formasını toldurıp, evelden qayd etilmesini rica ete.
“Vıstavkovıy tsentr” metro stantsiyasından müzeyniñ merkeziy kirişine qadar 58 nomeralı şeer avtobusı kete.
Tedbirniñ teşkilâtçıları – Qırımtatar Milliy Meclisi, “Qırım evi” DM, “Qadın Divanı” cemaat teşkilâtı, Qırım milliy varlıq fondu, “Qırım cebesi” birleşken platforması ve Ukrayina halq mimarlığı ve turmuşınıñ milliy müzeyi.
