Kıyivde qırımtatar halq bayramı Hıdırlez qayd etilecek

28.04.2026

Mayıs ayınıñ 2-nde Kıyivdeki Squat 17b medeniyet merkezinde Saba Qavesi leyhasınıñ bahar körüşüvi olıp keçecek. Bu sefer teşkilâtçılar, tedbirniñ mevzusını qırımtatar halq bayramlarından biri olğan ve yañartuv, bereketlik ve cemaatnıñ birligini timsal etken Hıdırlez bayramı olaraq belgilediler.

Çoqtan berli Qırımda mayısnıñ başında insanlar tabiatta toplaşa, milliy aşlarnı pişire, yırlay, oynay, yarışlarnı keçire ve baht-seadet tiley, Hıdırlez bayramını qayd ete ediler. Bu bayramnıñ timsalleri arasında ayat, ümüt ve yañartuvdır – bunlar bugün ayrıca müim olğan qıymetli şeylerdir.

Kıyiv şeerinde teşkilâtçılar ananeviy qırımtatar bayramınıñ müitini yaratmağa niyetleneler, anda er kes Qırımnen ve qırımtatar medeniyetinen bağ duya bilir.

Tedbir saat 12:00de saat 18:00ge qadar devam etecek ve onıñ muzıka, medeniyet, aş ve sport ceetleri olacaq. 

Sanada belli qırımtatar ve ukrayin artistleri çıqışta bulunacaq, olarnıñ arasında – Ukrayina halq artisti, bestekâr ve qırımtatar folklorınıñ tedqiqçisi Cemil Karikov, qırımtatar qavmiy-pank-rok Shatur-Gudur taqımı, 18school qırımtatar asıllı ukrayin taqımı, em de Dilâver Osmanov, Şevket Zmorka ve Ernes Osmanovnıñ iştirakinen qırımtatar halq muzıkası ansambli Тріо Musafir.

Tedbirge qatılğanlar ananeviy qırımtatar küreşini köre bilecekler – bu, tek Hıdırlez bayramınıñ degil, er bir qırımtatar bayramınıñ tarihiy ceetinden ayırılmaz parçası olğan qadimiy sport yarışıdır. Programmada köstergiç çıqışlar, açıq idman ve dostane yarışlar planlaştırıla.

Tedbirniñ müim qısmı qırımtatar ustalarınıñ usta dersleri ve yarmarlığı olacaq. Ziyaretçilerniñ ananeviy zenaatlarnen tanışmaq ve icadiy faaliyetke qatılmaq imkânı olacaq.

Kün devamında ananeviy qırımtatar qavesi, tatlıları ve pilâvnen aş zonası da çalışacaq.

Tedbir çerçivesinde qırımtatar edebiyatı ve zemaneviy ukrayin boşluğında Qırımnıñ rolüne bağışlanğan panel munaqaşası da olıp keçecek. Ayrıca qırımtatar bağçası olaraq foto zonası da olacaq.

Bayramnıñ ayrı elementi «Köbete yarışması» olacaq – bu, büyük aile ve bayram tedbirlerine pişirilgen qırımtatar etli köbetesi yarışmasıdır.

Bayramnıñ hayriye qısmı da olacaq. Yarmarlıqnıñ kârınıñ bir qısmı, qave ve tatlılardan alınacaq para ukrayin askerlerine qol tutumaq içün berilecek. Bayramğa kiriş sıñırsız, amma sadaqa bermek de mümkün olacaq. Ayrı hayriye teşebbüsi foto zonası olacaq, ondan alınacaq para Ukrayina halq mimarlığı ve turmuşı milliy müzeyiniñ toprağında qırımtatar eviniñ qurulmasına bağışlanacaq.

Tedbirniñ teşkilâtçıları arasında Qırımtatar Milliy Meclisiniñ yardımınen Squat 17b, Qadın Divanı, Qırım evi, CrimeaVOX ve Crimea Daily.

Yer: Squat 17b, Tereşçenkivska sq., 17b, Kıyiv ş.
Tarih: mayıs ayınıñ 2-si
Saat: 12:00–18:00
İstegeniñiz para miqdarını sadaqağa bere bilmesinen kişir sıñırsız