Yalova şeerinde türk dünyasında qadınlarnıñ rolüne bağışlanğan tedbirlerde Gayana Yüksel çıqışta bulundı

09.03.2026

Qırımtatar Milliy Meclisiniñ azası Gayana Yüksel, Türkiyeniñ Yalova şeerinde türk dünyasında qadınlarnıñ rolüne ve qırımtatar halqınıñ tarihına bağışlanğan bir sıra tedbirlerde iştirak etti.

Körüşüvlerni Yalova şeer memuriyeti, Yalova universiteti, Türk Ocakları teşkilâtı, “Yalova şeeriniñ qadınları” qadın teşkilâtı ve şeerniñ qırımtatar cemiyeti teşkil ettiler.

Gayana Yüksel qırımtatar qadınlarınıñ çeşit tarihiy devirlerde – XIX asırda milliy tiklenüvniñ başından bugünge qadar – rolü aqqında tarif etti. O, olarnıñ cemaat yaşayışında, maarif faaliyetinde, halqnıñ aqları oğrunda küreşinde ve milliy kimliginiñ saqlanuvında iştirak etkenlerini qayd etti.

XX asırnıñ başında eñ belli qırımtatar erbaplarından biri olğan Şefika Gasprinskayağa ayrı diqqat ayırıldı. 1917 senesi, dünyanıñ memleketleriniñ çoqusında qadınlarnıñ rey berüv aqqı olmağanda, o, diger qadınlarnen beraber Qırımtatar Milliy Meclisiniñ mebusı olaraq saylandı ve dünyada Meclis reisiniñ muavini saylanğan ilk qadın oldı.

Gayana Yükselniñ çıqışı vaqtında Ukrayinadaki ve vaqtınca işğal etilgen Qırımdaki şimdiki vaziyet aqqında söz yürsetildi. Qayd etilgenine köre, qırımtatar qadınları bugün de milliy küreşniñ faal qısmı olıp qalalar – qorantalarına, cemiyetlerine qol tutalar ve dünyanı Qırımdaki vaziyet aqqında haberdar etmege devam eteler.

Yalovada bulunğanı ekinci künü  iştirakçiler ocalar, tasil müitiniñ vekilleri ve cemaat sektorınıñ temsilcilerinen körüşip, türk dünyasında qadınlarnıñ rolüni muzakere ettiler.