Brüsselde rusiyeniñ tamır halqlarına qarşı basqısı muzakere etildi

05.03.2026

Saban ayınıñ 3-nde Brüsselde Avropa parlamentiniñ salonında “Tamır halqlarınıñ sesleri rusiye akimiyetiniñ repressiyalarına qarşı” tedbiri olıp keçti. Anda Qırımtatar Milliy Meclisiniñ azası, Qırımtatar Resurs Merkeziniñ idare reisi Eskender Bariev iştirak etti.

Tedbir Avropa parlamentiniñ mebusı Rasa Juknevičienėniñ yardımınen “Memorial” ayırımğa qarşı merkezinen beraberlikte teşkil etildi.

Muzakere esnasında iştirakçiler Ukrayinağa qarşı tecavuz ve Qırım işğali başlağanından soñ Rusiye akimiyetiniñ tamır halqlarına qarşı repressiyalarınıñ quvetleştirilmesini muzakere ettiler.

Öz çıqışında Eskender Bariev qayd etti ki, repressiyalarnıñ birinci dalğası tamır qırımtatar halqınıñ taqip etilmesi oldı. 2016 senesi Rusiye akimiyeti Qırımtatar Milliy Meclisini “aşırıcı teşkilât” olaraq ilân etip, yasaq etti ve oña bağlı er angi faaliyetni cinaiy olaraq tanıdı.

Bundan ğayrı, tedbir iştirakçileri 2022 senesinden soñ işğal etilgen Ukrayina topraqlarında qırımtatarlarnıñ taqip etilmesiniñ quvetleşmesine diqqat ayırdılar – hususan zorbalıqnen ğayıp etüv, qanunsız apis etüv ve insanlarnı Rusiyege mecburen alıp ketüv.

Başqa tamır halqlarına qarşı repressiyalarnıñ artması aqqında söz yürsetildi – rusiye federatsiyasında – hususan Başqırtistanda, Şimal, Sibir ve Uzaq Şarq halqları arasında.

Tedbirde saami halqınıñ vekili, Birleşken Milletler Teşkilâtınıñ tamır halqları meseleleri daimiy forumınıñ azası Valentına Sovkina (online) ve Başqırtistandan jurnalist Ruslan Valiev de iştirak ettiler. İştirakçiler rusiye federatsiyasınıñ akimiyeti altında tamır halqlarınıñ aqlarınıñ bozuluvına halqara diqqatını arttırmaq kerekligini qayd ettiler.