Saban ayınıñ 3-ü – Qırım işğaliniñ ilk qurbanı Reşat Ametovnıñ hırsızlanmasınıñ yıllığı

03.03.2026

2014 senesi saban ayınıñ 3-nde Aqmescitte 39 yaşındaki qırımtatar Reşat Ametov hırsızlandı – o, rusiyeniñ Qırım işğaliniñ ilk qurbanı oldı.

O künü Ukrayina qorçalayıcısı olmaq içün o, evden çıqtı. Arbiy qısım çalışmağanı sebebinden Reşat şeerniñ merkeziy meydanına çıqıp, rusiye ordusınıñ tecavuzına qarşı bir kişilik aktsiyanı başlattı. Kündüz “Qırım öz-özüni mudafaa eticileri”niñ temsilcileri onı tutıp aldılar ve meydandan zornen alıp kettiler. Berilgen malümatqa köre, Reşat Ametovnı hırsızlağan soñ onı Qırım işğal etilgende “Qırım öz-özüni mudafaa eticileri” ştablarından biri yerleşken ve esirlerni qanunsız alda tutqan Aqmescitteki “Rus birligi” Rusiye tarafdarı teşkilâtınıñ ofisine alıp ketkenler.

2014 senesi saban ayınıñ 15-nde Reşat Ametovnıñ cesedi Qarasuvbazar rayonınıñ Ortalan (Zemlânıçne) köyü rayonında tapıldı. Onıñ üzerinde azap izleri tapıldı: urulğan, başı skotçnen sarılğan edi. Mütehassıslarnıñ fikirince, hırsızlanğan bir afta keçken soñ sert bir şekilde urulğanı ve pıçaqlav yarasından yaralanğanı içün elâk oldı.

2014 senesi saban ayınıñ 18-de Reşat Ametovnı Aqmescitteki “Abdal” şeer mezarlığında defin ettiler.

2017 senesi mayıs ayında Reşat Ametovğa ölümden soñ Ukrayina Qaramanı unvanı berildi – Ukrayina devlet suvereniteti ve topraq bütünligini qorçalavda vatandaş cesareti ve fedakârlığı içün.

Onıñ facialı ve aynı zamanda qaraman ikâyesi qırımtatar ve ukrayinlerniñ Qırımnıñ Rusiye işğaline qarşı qarşılığınıñ timsali oldı. İşğal yılları devamında Rusiye rejiminiñ qurbanları cedveli yüzlernen yañı adlarnen – qırımtatarlar ve ukrayinlernen – toldurıldı.

Qırımtatar Milliy Meclisi işğalcilerge qarşı çıqmaqtan qorqmağan ve bunıñ içün öz canını feda etken adam olğan Reşat Ametovnı ürmetnen aña.

Allah rahmet eylesin!