Kiçik aynıñ 24-ü – Rusiyeniñ Ukrayinağa istilâsınıñ dörtünci yıllığı

24.02.2026

Dört yıl evel tecavuzcı bir devlet, bizim devletçiligimiz ve serbestligimizni, ukrayin halqınıñ öz kelecegini öz başına belgilemek aqqını yoq etmege tırışıp, Ukrayinağa qarşı açıq cenkni başlattı. Amma bu cenk 2022 senesi başlamadı. O, 2014 senesi kiçik ayda Qırım ve Aqyar şeeriniñ qanunsız işğalinden ve Ukrayinanıñ şarqındaki kelecek tecavuzdan başlandı.

Vaqtınca işğal etilgen Qırımnı Rusiye arbiy bazağa çevirdi ve qıtaiy Ukrayinağa qarşı ilerideki ücümler içün temel oldı. Yarımadanıñ toprağından sıq-sıq raketa ücümleri yapıla, ordu ve tehnika avuştırıla. Qırım cenkniñ aleti oldı, amma aynı zamanda dayanıqlıq timsali olaraq qaldı.

2014 senesi işğalge qarşı ilk sefer açıq şekilde çıqqan qırımtatar halqı taqip, apis, azaplar ve on biñlernen adamnıñ mecburiy sürgün etilmesine oğradı. Repressiyalarğa baqmadan, qarşılıq devam ete. Cebede, gizli yerlerde, diplomatiyada, haber boşluğında küreş devam ete. Ukrayina toprağınıñ er bir metrini – şu cümleden Qırımnı da – azat etmek içün küreş devam ete.

Bugün Ukrayina tek öz mustaqilligini qorçalap qalmay, bütün dünya içün serbestlik, menlik ve halqara uquqnıñ esas degerliklerini qorçalap, Rusiye tecavuzını toqtata.

Bu künü biz bu küreşte canını feda etkenlerniñ hatırasına başımıznı egemiz: arbiy hızmetçiler ve vatandaşlar, qırımtatarlar ve ukrayinler, Ukrayinanı qorçalağan bütün halqlarnıñ vekilleri. Olarnıñ qurbanları – bizim serbest devlette yaşamaq aqqımız içün eñ yüksek fiyattır.

Biz hatırlaymız.
Biz küreşemiz.
Biz Qırımnı azat etip, Ukrayinanıñ topraq bütünligini ğayrıdan tikleycekmiz.