Gayana Yüksel “Günebakanların Direnişi” filminiñ taqdiminde iştirak etti

23.02.2026

Qırımtatar Milliy Meclisiniñ azası Gayana Yüksel, Ukrayinanıñ qarşılığı ve Qırımnıñ vaqtınca işğali aqqında tarif etken “Günebakanların Direnişi” vesiqalı filminiñ taqdim merasimindeki panel munaqaşasında iştirak etti.

Film Türkiyedeki Avropa Birliginiñ Temsilciligi ve Türkiyedeki Ukrayina Elçihanesiniñ desteginen azırlandı. Tedbirni Ukrayina elçisi Nariman Celâl, Poloniya elçisi Matsey Lang (Maciej Lang) ve Türkiyedeki AB eyyetiniñ temsilcisi Yurgis Vilçinkas (Jurgis Vilçinkas) açtılar.

Gayana Yüksel teşkilâtçılarğa film çıqarılmasında iştirak etip, ukrayin halqınıñ küreşi aqqında tarif etmege imkân bergenleri içün teşekkürler bildirdi. Öz çıqışında o, hususan türk seyircileri içün böyle vesiqalı leyhalarnıñ yaratılmasınıñ müimligini qayd etti, anda Rusiye teşviqatına qarşılıq köstermek ve Ukrayinanıñ kerçek nazar noqtasını bildirmek kerek, bu cenkniñ sebepleri ve maiyeti aqqında obyektiv añlav şekillendirilmeli.

Onıñ qayd etkenine köre, Rusiyeniñ Ukrayinağa tolu miqyaslı ücüminiñ, Rusiye teşviqatını tarqatqan “NATO” ya da “rus tilli ealiniñ qoruvı” aqqında ikâyelerge iç bir alâqası yoq:

“Bu, Ukrayina devletini yoq etmek maqsadınen yapılğan cenktir. Bugün Ukrayina temel insan qıymetlerini qorçalap, küreşniñ cebesinde tura”.

Muzakereler vaqtında Qırımnen bağlı suallerge cevaplar berildi. Qayd etilgenine köre, Ukrayina Qırımdan vazgeçmey ve onıñ nazar noqtasını deñişmeyip qala.