Meclis delegatsiyasınıñ azaları Almaniyada vaqtınca oturğan vatandaşlarnen körüşti

21.02.2026

2026 senesi kiçik aynıñ 20-nde Almaniyağa iş ziyaretiniñ birinci kününde Qırımtatar Milliy Meclisiniñ reisi Refat Çubarov ve Qırımtatar Milliy Meclisiniñ azası Eskender Bariev Neuss şeerinde Almaniyada vaqtınca oturğan işğal etilgen Qırımdan kelgen semetdeşlerinen körüşti.

Körüşüvden evel Almanya Türk Federasyonunıñ Nöysk bölüginde teşkil etilgen iftar olıp keçti. Birleşken iftarğa Düsseldorf ve diger şeerlerden qırımtatarlar, em de Şimaliy Reyn-Vestfaliya federal toprağında faaliyet köstergen türk ve turk cemiyetleriniñ vekilleri toplaştılar.

İftardan soñ, tahminen 70 insan toplaşqan soñ, toplaşuv büyük zalda devam etti, anda bir çoq mesele muzakere etildi. Olarnıñ arasında – Rusiye-Ukrayina cenki ve işğal etilgen Qırımda vaziyet, vaqtınca bulunğan memleketlerde vatandaşlarnıñ meseleleri, em de qırımtatarlar işğal etilgen Qırımda taqip etilgenleri içün ketmege mecbur olğan çetel memleketlerinde til ve medeniyet kimliginiñ saqlanuvı.

Aman-aman bütün çıqışta bulunğanlar Almaniyadaki qırımtatar cemiyetiniñ öz-özüni teşkil etüviniñ ve Almaniyadaki ukrayin teşkilâtları ve diplomatik müessiselerinen işbirlikniñ keñleştirilmesiniñ müimligini qayd ettiler.

Körüşüvniñ esas mevzusı – Almaniyadaki qırımtatarlar evge, öz tuvğan Qırımına, Rusiye işğalcilerinden azat etilgen Qırımğa, tezce qaytmaq içün ne ve nasıl yapmaq kerekleridir.

Qırımtatar Milliy Meclisiniñ reisi Refat Çubarov ve Meclis azası Eskender Bariev, bir çoq sualge cevap berip, halqnı birleştirmek ve Qırımnı Rusiye işğalinden qurtarmaq içün faaliyetini faalleştirmek maqsadınen vatandaşlarnıñ cemaat teşebbüsleri Meclisniñ qol tutuvını alacağına işandırdılar.

Körüşüvde Düsseldorftaki Ukrayina Baş konsullığınıñ hadimi Oleksandr Kojema ve Şimaliy Reyn-Vestfaliy topraqlarınıñ bir sıra Türkiye cemaat teşkilâtlarınıñ reberleri iştirak ettiler.

Qayd etemiz. İşğalli Rusiye akimiyeti Qırımnı terk etmege mecbur olğan, amma qırımtatar halqınıñ aqları oğrunda küreşmege ve öz devletine – Ukrayinağa – qol tutmağa devam etken tuvğan ve yaqın qırımtatarlarnı taqip etkeni içün, biz olarnıñ resimlerinen fotoresimlerniñ yayınlanmasını red etemiz.