Kıyivde “CrimeaVox: İşğalniñ hronikası” vesiqalı leyhası taqdim etildi

18.02.2026

Kiçik aynıñ 17-nde “Kıyiv-Moğıla akademiyası” Milliy universitetiniñ baş binasında “CrimeaVox: İşğalniñ hronikası” vesiqalı leyhasınıñ birinci qısmınıñ taqdim merasimi olıp keçti. O, Qırımnıñ vaqtınca işğali vaqialarını aydınlatmağa, şaatlarnıñ ifadelerini saqlamağa ve tasil, cemaat subeti ve adliyecilik içün delil bazasını teşkil etmege doğrultılğan.

“CrimeaVox: İşğalniñ hronikası” vesiqalı serialı leyhası müellifi, stsenariy yazıcısı ve alıp barıcısı Süleyman Mamutov ve prodüseri Muslim Umerovnıñ reberliginde QırımVox media taqımı tarafından Büyük Britaniya ükümetiniñ desteginen meydanğa ketirildi.

“CrimeaVox: İşğalniñ hronikası” doquz vesiqalı film tsikli olıp, Qırımdaki Rusiye istilâsınıñ şartlarını aydınlata ve işğalni mümkün etken esnaslar ve faktorlarnı talil ete. Filmlerde 2014 senesinden başlap işğalniñ inkişafı, 12 yıllıq işğalde qarşılıq mehanizmleri, repressiya aletleri ve insan aqlarınıñ bozulması kösterile. Müelliflerniñ qayd etkenine köre, böyle malümatlar Rusiye Federatsiyası tarafından Qırımnıñ statusı aqqında tarqatılğan teşviqiy ikâyelerni yoq etmek içün müimdir.

Tedbirde Qırımtatar Milliy Meclisiniñ reisi Refat Çubarov, Ukrayina Prezidentiniñ Qırımdaki Daimiy Temsilcisiniñ muavini Denıs Çıstikov, Ukrayina halq mebusı Tamil Taşeva, “Kıyiv-Moğıla akademiyası” Milliy universitetiniñ prezidenti Serğiy Kvit, Büyük Britaniya Qırallığınıñ Ukrayinadaki Elçisiniñ muavini Şarlotta Süren, Qırım musulmanları Diniy idaresiniñ Yuqarı müftisi Ayder Rustamov ve diger davet etilgen musafirler iştirak ettiler.

“Aqiqat yaşamaq kerek, Rusiye Federatsiyasınıñ asırlar devamında qurğanı yalan ve teşviqatqa qarşı çıqmaq kerek”, – dep leyhanıñ prodüseri Muslim Umerov ayttı.

Qırımtatar Milliy Meclisiniñ reisi öz çıqışında qayd etti ki, Ukrayina devleti mustaqilliginiñ 23 yılı devamında Qırımğa nisbeten açıq devlet siyaseti alıp barğan olsa edi, Qırım işğaline yol bermez edi:

“2014 senesi olıp keçken vaqialar bir kere daa kösterdi ki, eger de sen öz memleketiñni ya da memleketiñniñ ayrı bir bölgesini qayğırmasañ, onı qolaylıqnen ğayıp ete bilesiñ”.

Taqdimde ZMINA insan aqları merkeziniñ ortaq teşkilâtınıñ eki teşebbüsi de bar edi: “Babasını beklegende balalıq” fotoresim sergisi, ana-babası Qırım işğali neticesinde Rusiyeniñ azatlıqtan marum etilgen yerlerinde yaşağan balalarğa bağışlandı. Bundan da ğayrı, tedbir çerçivesinde iştirakçiler “Serbest Qırımğa mektüpler” teşebbüsi çerçivesinde qanunsız şekilde apiske alınğan ukrayinalılarğa mektüpler yaza bildiler.

Vesiqa leyhası kiçik aynıñ 23-nde CrimeaVox dijital meydançıqlarında yayınlanacaq.

FOTO: CrimeaVox