Ruslan Kurtmallayev Rusiye esirliginden azat etildi

05.02.2026

Bugünki arbiy esirlerniñ deñiştirilüvi çerçivesinde Rusiye tarafından tutulğan daa bir qırımtatar – Canköy rayonınıñ vatandaşı Ruslan Kurtmallayev azat etildi.

2014 senesinden, 18 yaşından berli Ruslan Kurtmallayev Ukrayina Silâlı quvetlerinde hızmet ete. O, baş çavuş, USQniñ 36 ayrı deñiz piyade brigadasınıñ 501 ayrı deñiz piyade batalyonınıñ bölük komandanı ola.

2022 senesi çeçek ayınıñ 4-nde Rusiyeniñ esiri Ruslan Kurtmallayev Mariupol mudafaasında tutuldı. Bundan soñ onıñ ile bağ aman-aman yoq oldı. 2022 senesiniñ yazında qoranta, onıñ sağ olğanını añlağan bir qaç satırlı qısqa mektüp aldı. 2023 senesiniñ küzünde Rusiye toprağındaki müstemlekeden tek bir telefon olıp keçti, o vaqıt Ruslan esirlikte olğanını bildirmege yetiştirdi.

Umumen Ruslan Kurtmallayev 3 yıl ve 10 ay Rusiye esirliginde keçirdi, olardan eki yıldan ziyadesi tüzetüv müstemlekesiniñ bir kişilik kamerasında tutıldı.

Qırımtatar Milliy Meclisi Ruslan Kurtmallayevni azatlıqta qarşılay ve onıñ azat etilmesini beklegen, işanğan soy-sopları ve yaqınları içün samimiy şadlıq bildire.