Cemilev ve Çiygöz “Avropa Birdemligi”nen beraber Mudafaa quvetlerine yardım berdiler

23.01.2026

Ukrayina Birdemligi künü Ukrayina halq mebusları, qırımtatar halqınıñ lideri Mustafa Cemilev ve Qırımtatar Milliy Meclisiniñ reisiniñ muavini Ahtem Çiygöz “Avropa Birdemligi” halq mebuslarınen beraber Ukrayina Mudafaa quvetleriniñ mevamlarını ziayret etip, 14 brigadanıñ bölükleri içün dronlar ve cihazlarnı berdiler.

Berilgen yardımnıñ umumiy fiyatı tahminen 30 million ğrıvnâ teşkil ete. Arbiy hızmetçiler 125 “Blıskavka” kompleksi, 55 FVP-dron, şu cümleden generatorlar, şarj stantsiyaları, Starlink kompleksleri ve başqa kerekli elektron cihazlarnı aldılar.

Arbiy hızmetçilernen körüşkende Ahtem Çiygöz qorçalayıcılarnı Ukrayina Birdemligi kününen hayırlap, ukrayinalılarnıñ birdemligini ve vaqtınca işğal etilgen topraqlarnıñ sakinlerniñ dayanıqlığını qayd etti:

“Men Qırım, Donetsj ve Luğansk vilâyetlerinden vatandaşlarımız adından sizni ve siziñ adıñızdan olarnı Birdemlik kününen hayırlamağa isteyim, çünki olar öz kelecegini Ukrayinasız körmeyler. Ukrayinanıñ topraq bütünligi ve birdemliginiñ temeli siziñ hızmetiñiz ola. Biz, elimizden kelgenini yapmağa devam etecekmiz, işğal etilgen topraqlarda oturğan vatandaşlarımız ise qarşılıq köstermege devam etecekler, çünki Ukrayiba Silâlı Quvetlerine, ukrayin halqı ve Ukrayinağa işanalar”.