Kıyivde “Ukrayinanıñ tamır halqları aqqında” Ukrayina Qanunınıñ yerine ketirimesine dair tögerek masa olıp keçti

15.01.2026

Qara qış ayınıñ 15-nde Kıyivde “Ukrayinanıñ tamır halqları aqqında” Ukrayina Qanunınıñ yerine ketirilmesiniñ vaziyeti ve oña dair uquqiy vesiqalarnıñ azırlanuv esnasını muzakere etmege bağışlanğan tögerek masa olıp keçti.

Ukrayinanıñ Qavmiy siyaset ve vicdan serbestligi devlet hızmeti, Qırımtatar resurs merkezi ve Qırımtatar Milliy Meclisi tedbirni teşkil etti.

Tögerek masada Ukrayinanıñ Qavmiy siyaset ve vicdan serbestligi devlet hızmetiniñ reisi Viktor Yelenskıy, Qırımtatar Milliy Meclisiniñ reisi Refat Çubarov, Qırımtatar Milliy Meclisiniñ azası, Qırımtatar resurs merkeziniñ idare reisi Eskender Bariev, Ukrayina Prezidentiniñ Qırım Muhtar Cumhuriyetindeki Daimiy Temsilcisiniñ muavini Denıs Çıstikov, em de tamır halqlarınıñ aqları saasında mütehassıslar, Ukrayinanıñ tamır halqlarınıñ vekilleri, vatandaş cemiyeti institutları ve ihtisas teşkilâtları iştirak etti.

Tedbir vaqtında qayd etildi ki, 2021 senesi qabul etilgen “Ukrayinanıñ tamır halqları aqqında” Ukrayina Qanunı tamır halqlarınıñ aqlarını qorçalav saasında devlet siyasetiniñ şekillenmesinde müim bir basamaq oldı. Aynı zamanda iştirakçilerniñ qayd etkenine köre, onıñ ameliy ömürge keçirilmesi, hususan kerekli uquqiy vesiqalarnıñ azırlanması ve qabul etilmesi esas meselelerden biri olıp qala.

Qırımtatar Milliy Meclisiniñ reisi Refat Çubarov öz çıqışında qayd etti ki, “Ukrayina ükümetiniñ böyle qarar qabul etmesi, Ükümet “Ukrayinanıñ tamır halqları aqqında” Ukrayina Qanunını yerine ketirmek müimligini añlamağanını köstere. O, iç bir şey añlamay. Ya da, añlasa, neticeleri daa beter olur – olar Ukrayina devletini bütün Ukrayina içün müim olğan eñ aktual meselelerni çezmek içün belli bir mehanizmlerden marum eteler”.

Tögerek masa çerçivesinde iştirakçiler devlet akimiyeti organlarınıñ idarelerara işbirligi meselelerini muzakere ettiler, qanun astı normativ-uquqiy aktlarnıñ azırlanuv vaziyetini muzakere ettiler, em de “Ukrayinanıñ tamır halqları aqqında” Ukrayina Qanunınıñ 2025-2026 seneleri içün yol haritasını taqdim ettiler.

Qırımtatar Milliy Meclisiniñ azası, Qırımtatar resurs merkeziniñ idare reisi Eskender Bariev “Ukrayinanıñ tamır halqları aqqında” Ukrayina Qanunınıñ tolusınen işlenmesini temin etmek içün qabul etilmesi kerek olğan 17 normativ-uquqiy aktnıñ cedvelini taqdim etti, em de bu aktlarnıñ amelge keçirilmesini temin etmek içün deñişmeler kirsetilmesi kerek olğan qanunlar saalarını belgiledi.

Tedbir iştirakçileri şunı da qayd ettiler ki, Qanunnıñ semereli yerine ketirilmesi halqara seviyede de müimdir, çünki tamır halqlarınıñ aqlarını qorçalav standartlarına riayet etüv çerçivesinde Ukrayinanıñ dünya imicine tesir ete.