Diplomatik hızmet hadimleri künü hayırlı olsun!

22.12.2025

Qırımtatar Milliy Meclisi bütün ukrayin diplomatlarına halqara arenada er kün özlerini feda etkenleri, printsipial noqta-i nazarları ve Ukrayina menfaatlarına sadıq olğanları içün teren ürmet ve samimiy minnetdarlığını bildire. Devletimiz içün ğayet qıyın vaqıtta ukrayin diplomatları dünyada Ukrayinanıñ sesi ola, onıñ suvereniteti ve topraq bütünligini qorçalay, halqara toplulıqqa Rusiye istilâsı ve ukrayin halqınıñ cesürliknen küreşken azatlığı aqqında aqiqatnı bildireler.

Ukrayina Tış işler nazirligi, Ukrayina tış diplomatik müessiseleri, elçilikleri ve konsullıq hızmetleriniñ Qırımtatar Milliy Meclisinen munasebeti ve semereli işbirligine pek qıymet kesemiz. Ukrayina diplomatlarınıñ ardı-sıra ve israrlı çalışması Qırımnıñ işğalden azat etilmesi, tamır qırımtatar halqınıñ aq-uquqlarınıñ qorçalanması, vaqtınca işğal etilgen yarımadanıñ Ukrayinağa sadıq qalğan bütün sakinlerine qol tutuv ve Qırımnıñ azat etilmesi meselesiniñ halqara siyasetniñ diqqat merkezinde tutulması içün pek müimdir.

Qırımtatar Milliy Meclisi adından Ukrayina diplomatik hızmetiniñ hadimlerine qaviy sağlıq, iş muvafaqiyetleri ve yañı diplomatik ğalebelerni tileymiz. İşleriñiz ileride de Ukrayinanıñ Rusiye istilâcısına qarşı ğalebe qazanması, Qırım ve Ukrayinanıñ vaqtınca işğal etilgen diger topraqlarınıñ azat etilmesi, serbest, küçlü ve mustaqil Ukrayina devletiniñ tesis etilmesi yolunda müim neticelerge ketirsin!

Refat Çubarov

Qırımtatar Milliy Meclisiniñ Reisi

Kıyiv ş.

2025 senesi ilk qış ayınıñ 22-si