Meclis Ukrayina Prezidentiniñ Qırımdaki Temsilciligini 33-ünci yıllığı munasebetinen hayırlay

17.12.2025

Qırımtatar Milliy Meclisi Ukrayina Prezidentiniñ Qırım Muhtar Cumhuriyetindeki Temsilciligini 33-ünci yıllığı munasebetinen samimiy hayırlay.

Bu yıllar devamında Temsilcilik qıyın ve mesüliyetli bir yol keçti, Qırımnıñ vaqtınca işğali başlağanınen onıñ faaliyeti ayrı emiyetke malik oldı. Temsilcilikniñ tarihınıñ aman-aman üçte biri işğal vaqtında keçti – bu devir Ukrayinanıñ Qırımğa dayanıqlığı, printsipialligi ve sadıqlığı içün sınav oldı.

Temsilcilik Qırımtatar Milliy Meclisiniñ işançlı ve ardı-sıra ortağı ola. İşğalniñ bütün yılları devamında bizni insan aqlarını qorçalav, Qırım siyasiy mabüslerine qoltutuv, Qırımnıñ işğalden azat etilmesi içün halqara qoltutuv, yarımada sakinlerinen bağ tutmaq ve Qırım mevzusını milliy ve halqara kün tertibinde yerleştirmek içün umumiy iş birleştire – bularnıñ episi devlet müessisesiniñ ve Ukrayina tamır halqınıñ temsil organınıñ semereli işbirliginiñ misalleridir.

Qırımtatar Milliy Meclisi Temsilcilikniñ taqımına zenaatkarlığı, işke ısrarlığı ve sadıqlığı içün samimiy minnetdarlığını bildire. Eminmiz ki, işbirligimiz devamlı ve semereli olacaq – Ukrayina topraq bütünligi ve Qırımnıñ Ukrayina suverenitetine qaytarılmasına qadar.

Temsilcilikke küç, dayanıqlıq, Ukrayina ve Qırımğa hızmetinde muvafaqiyetler tileymiz.

Qırım Ukrayinadır!