Çubarov: “Ğayıp etilgen 10 yıl” filmi – devletniñ öz vatandaşları ögünde mesüliyeti aqqında

16.12.2025

İlk qış ayınıñ 14-nde Kıyivde İrına Sampannıñ “Ğayıp etilgen 10 yıl” vesiqalı filminiñ taqdim merasimi olıp keçti. O, Suriye Al-Hol ve Roj lagerlerinden Ukrayina vatandaşlarını – qadın ve balalarnı – qaytarmaq içün çoq yıllıq operatsiyağa bağışlandı. Özü de azat etüv ceryanında iştirak etken Qırımtatar Milliy Meclisiniñ reisi Refat Çubarov öz teessuratlarınen paylaştı.

Film yedi yıldan ziyade devam etken Ukrayina Mudafaa nazirliginiñ Baş istihbarat idaresiniñ mahsus operatsiyasını tasvirley. Film Suriye, İraq ve Ukrayinada çıqarıldı. Filmniñ ortasında 2014 senesinden soñ blokada, açlıq, “İslâm devleti” terror teşkilâtınıñ askerleriniñ zulumı ve qaçaqlar içün lagerlerniñ insaniyetsiz şaraitinde yıllar devamında tutulğan ukrayin qadınları ve balalarınıñ taqdirleri kösterile.

Refat Çubarov hatırlattı ki, 2018 senesiniñ ekinci yarısında Ukrayina vatandaşları olğan qadınlar ve olarnıñ tuvğanları, hususan vaqtınca işğal etilgen Qırımdan, Qırımtatar Milliy Meclisine yardım içün muracaat ettiler. Bu vaqıttan itibaren esir etilgen qadınlarnı ve balalarnı azat etüv işi başlandı. İlk basamaqta koordinatsiyanı Meclis, soñra Ukrayina Tış işler nazirligi ete edi, doğrudan-doğru tahliye tedbirlerini ise Ukrayinanıñ mahsus hızmetleri keçire edi.

Qadın ve balalarnıñ birinci qaytarıluvı 2019 senesiniñ soñunda olıp keçti, nevbetteki – 2021 senesi, ve 2025 senesiniñ baarinde soñki qoranta Ukrayinağa qaytqan soñ operatsiya yekünlendi. Umumen Suriyeden 89 Ukrayina vatandaşı tahliye etildi. Ukrayina, evge qaytmaq istegen bütün vatandaşlarını qaytarıp olğan az sayılı devletlerden biri oldı.

Meclis reisi qayd etti ki, bu neticeler Qırımtatar Milliy Meclisi, ukrayin arbiy hızmetçileri, diplomatlar, mahsus hızmetler, esirlerniñ qorantaları ve halqara ortaqlarnıñ umumiy ğayretleri sayesinde oldı.

Refat Çubarovnıñ qayd etkenine köre, bu film tek qıyın insan taqdirleri aqqında degil de, ururlanmaq mümkün ve kerek olğan Ukrayina devletiniñ öz vatandaşları ögünde mesüliyeti aqqındadır.