Qırımtatar halqınıñ vekilleri Halqara türk tiller qorantası kününe bağışlanğan tedbirlerde iştirak ettiler

15.12.2025

İlk qış ayınıñ 15-nde, Halqara türk tiller qorantası künü, Qırımtatar Milliy Meclisiniñ azası Gayana Yüksel Türkiyedeki qırımtatar cemaat teşkilâtlarınıñ reberliginen beraber Türkiye Cumhuriyetiniñ Prezidenti Recep Tayyip Erdoğannıñ iştirakinen keçirilgen tedbirde iştirak etti. Tedbir vaqtında Türk dünyasınıñ inkişaf kontseptsiyası ve strategik körüşüvi taqdim etildi.

Halqara türk tiller qorantası künü, 43-ünci Baş konferentsiyasında Samarkandda UNESCO tarafından ilân etilgen yañı resmiy bayramdır ve bu sene ilk sefer qayd etile. Bu künniñ kirsetilmesi teşebbüsi Türkiye Prezidentine ait edi ve UNESCO seviyesinde türk devletleri tarafından desteklendi.

İlk qış ayınıñ 15 künü timsal olaraq saylandı: 1893 senesi bu künü Danimarkalı tilşınas Vilhelm Tomsen, VIII asırğa ait olğan eñ eski türk tilleriniñ yazılı hatırası olğan Orhon yazılarını deşifre etkenini ilân etti.

Türk tilleri büyük bir til qorantasını teşkil ete, bugünde-bugün onı Türkiyeden Kavkazğa qadar Merkeziy Asiya ve Sibirge qadar dünyanıñ farqlı bölgelerinde 200 milliondan ziyade insan qullana. Bu bayram türk dünyasınıñ birligini, asırlıq tarihını ve medeniy mirasını qayd etmek içün teşkil etildi.

Facebook saifesinde Gayana Yüksel qırımtatar tiliniñ müimligini qayd etti. Qırımtatar tili – XX asırnıñ genotsidi ve Rusiyeniñ Qırım işğali sebebinden ğayıp olmaq telükesi altında bulunğan türk tillerinden biridir. O, tilni ğayrıdan tiklemek, faal ögrenmek ve kelecek nesillerge ögretmek kerekligini qayd etti, çünki til – halqnıñ kimligi ve maneviy temelidir.