Menü 
Kıyivde Ukrayina tamır halqları kongressi olıp keçti
03.12.2025
İlk qış ayınıñ 2-nde Kıyivde Birinci Ukrayina tamır halqları kongressi olıp keçti – 150-den ziyade iştirakçi toplanğan büyük bir tedbir: tamır halqlarınıñ vekilleri, arbiy hızmetçiler, cemaat liderleri, ükümet hadimleri, diplomatlar, uquq qorçalayıcılar, jurnalistler ve halqara ortaqlar.
Kongressniñ teşkilâtçıları arasında Ukrayina qavmiy siyaset ve vicdan serbestligi devlet hızmeti, Qırımtatar Milliy Meclisi, Ukrayina Prezidentiniñ Qırım MCdeki Temsilciligi, Qırımtatar Resurs Merkezi, “Ukrayina Qaraylar Birligi” CT ve qırımçaq halqınıñ vekilleri.
Kün devamında tamır halqlarınıñ Ukrayinanı qorçalavda iştiraki, rusiye tecavuzınıñ oluvı, dünya meydanında tamır halqlarınıñ temsil etilmesi, medeniy mirasnıñ saqlanuvı ve “Ukrayina tamır halqları aqqında” qanunınıñ amelge keçirilmesine bağışlanğan beş panel munaqaşası olıp keçti.
Tedbirniñ tantanalı soñunda milliy ve halqara seviyede ortaq Ukrayina tamır halqları Rezolütsiyası ilân etildi. Böyleliknen, milliy seviyede tamır halqları “Ukrayina tamır halqları aqqında” Ukrayina qanunınıñ tolusınen ve semereli şekilde amelge keçirilmesi, olarnıñ temsiliy institutlarınıñ, hususan Qırımtatar Milliy Meclisiniñ resmiy tanılması, em de Ukrayina tamır halqlarınıñ turğun inkişafı devlet strategiyasınıñ işlep çıqarılması ve amelge keçirilmesinde israr eteler.
Aynı zamanda halqara seviyede Ukrayina tamır halqları rusiye-Ukrayina cenki şaraitinde öz aqlarını qorçalavda keñ qol tutuvğa irişmege tırışalar ve olarnıñ riayet etilmesi muntazam nezaret etilmesini talap eteler. Rezolütsiyada BMT ve OSCEni areket planları ve gumanitar cevap azırlamağa ve Ukrayina tamır halqlarına medeniy, gumanitar ve iqtisadiy destek köstermek içün halqara programmalar qurmağa çağırdılar.
Kongressniñ soñunda tamır halqlarınıñ liderleri ananeviy bahşışlarnı ediye ettiler.
Kongress işini Ukrayina qavmiy siyaset ve vicdan serbestligi devlet hızmetiniñ reisi Viktor Yelenskıy ve Qırımtatar Milliy Meclisiniñ reisi Refat Çubarov bitirdiler, iştirakçilerge semereli iş ve birlik içün teşekkür bildirdiler.
Birinci Ukrayina tamır halqları kongressiniñ Rezolütsiyasınıñ tolu metininen MINDA tanış olmaq mümkün.
Відео:
