Meclis vekilleri Kıyivdeki Mustafa Kemal Atatürkniñ hatırasını añuv merasiminde iştirak ettiler

10.11.2025

Boş aynıñ 10-nda Türkiye Cumhuriyetiniñ Ukrayinadaki Elçihanesinde Türkiye Cumhuriyetiniñ qurucısı ve birinci prezidenti Mustafa Kemal Atatürkniñ hatıra künü munasebetinen hatıra tedbirleri keçirildi.

Er yıl şu künü, tam olaraq saat 09:05te –Atatürkniñ 1938 senesi vefat etken künü – bütün Türkiye boyunca ayat eki daqqağa toqtamağa başlay. Sirenler, araba ve gemilerniñ sesleri eşitile, bütün memlekette insanlar devlet yolbaşçısınıñ hatırasına bir daqiqalik sükünet köstereler.

Kıyivde hatıra merasimine Türkiye Cumhuriyetiniñ Ukrayinadaki Fevqulâde ve Vekâletli Elçisi Mustafa Levent Bilgen, Azerbaycannıñ Ukrayinadaki Fevqulâde ve Vekâletli Elçisi Seymur Mardaliyev, Qırımtatar Milliy Meclisiniñ reisi Refat Çubarov, Meclis azası Riza Şevkiyev, Ukrayinadaki TİKA koordinatorı Yahya Kemal Tunca, elçilik hadimleri ve türk cemiyetiniñ vekilleri qoşuldılar.

Merasim devamında Türkiyeniñ devlet gimni yañğıradı, iştirakçiler bir daqiqalik sükünetnen Atatürkniñ hatırasını añdılar. Öz çıqışında Elçi Levent Bilgen, zemaneviy Türkiye Cumhuriyetiniñ temeli olğan Mustafa Kemal Atatürkniñ islâat ve devlet qurucılığı faaliyetiniñ tarihiy emiyetini qayd etti.