Kıyivde “Qırımnıñ canlı mirası” leyhası taqdim etildi

27.10.2025

Kıyivde “Qırımnıñ canlı mirası” leyhasınıñ taqdim merasimi olıp keçti. Bu, seyircilerni qırımtatarlarnıñ zengin medeniy mirasınen, şu cümleden ananeleri, zenaatları ve milliy yemeklerinen, tanış etecek üç vesiqalı filmler seriyasıdır.

“Qırımnıñ canlı mirası” seyircilerge tuvğan toprağı aqqında hatıra yaşağan eski adet, zenaat ve tatlar dünyasını aça. Bu, Qırım medeniyetiniñ halqınıñ qollarında, yüreklerinde ve ruhlarında yaşamağa devam etmesiniñ ikâyesidir – hususan film qaramanlarında: qırımtatar sanatınıñ kollektsioneri Ayşe Umerova, Qırım arhiv fotoresimleriniñ kollektsioneri ve populârlaştırıcısı Tenzile Topalova, oyuncı ve horeograf Elnara Halilova, tilşınas ve oca Afize Emiramzayeva, M. Dragomanov adına UDUniñ dizayn kafedrasınıñ müdiri Liliya Derman, “Musafir” qırımtatar restoranları ağınıñ baş aşçısı Zemfira Bektemirova, qırımtatar aşhanesiniñ elçisi Luran Tulçıy.

Taqdim merasiminde bir çoq musafir toplandı, olarnıñ arasında – Qırımtatar Milliy Meclisiniñ reisi Refat Çubarov ve Ukrayina Prezidentiniñ Qırım Muhtar Cumhuriyetindeki Daimiy Temsilcisiniñ muavini Denıs Çıstikov.

Refat Çubarov qayd etti ki, kerçek ananelerni keçirmege tırışqan er şey doğru olmaq kerek:

“Filmde iştirak etkenler tek eminliknen bilgenlerini ayta ediler. On yıllar keçken soñ qullanıla bilecek kerçek bir filmdir”.

Leyhanıñ müellifleri – rejissör Serğiy Şarayevskıy, stsenariy müellifi Andriy Kokotüha, mesleatçı Mavile Halilova ve kurator Oksana İsidorova.

“Bu film – öz ikâyelerini tarif etken insanlar aqqında, seyircilerni, belki de, iç körmegen Qırımğa alıp kete. Bu, biri-birimizni toqunmaq, duymaq ve tanımaq imkânıdır”, – dep kösterüvden evel leyha mesleatçısı Mavile Halilova qayd etti.

Skenariy müellifi Andriy Kokotüha, seriyanıñ esas vazifelerinden biri – uzun zamandır medeniyet boşluğında ve haberler arasında bar olğan “Qırımnı Rusiye kontekstinden ayırmaq” olğanını qoştı. BAĞLANTIğa basıp, bütün filmler seriyasını seyir etmek mümkün.