Eskender Bariiev Tamır halqları Baş Assambleyassınıñ onlayn oturışına qatnadı

30.09.2025

2025 senesi ilk küz ayınıñ 26-nda Qırımtatar Milliy Meclisiniñ azası, Qırımtatar resurs merkeziniñ idare reisi Eskender Bariiev, Tamır halqları Baş Assambleyassınıñ “80 yıldan soñ barışıq, inkişaf ve insan aqları içün daa yahşı oldıqmı?” mevzusına ve BMTnıñBaş Assambleyassınıñ 80-nci sessiyasına bağışlanğan onlayn oturışına qatnadı.

Toplaşuv çerçivesinde iştirakçiler Birleşken Milletler Teşkilâtınıñ tamır halqlarınıñ ayatına tesirini muzakere ettiler ve qıymetlendirdiler, şu cümleden: “80 yıllıq Birleşken Milletler Teşkilâtı ve tamır halqlarınıñ barışıq, inkişaf ve aqlar oğrunda küreşi aqqında tüşünceler”, “Tamır halqlarınıñ barışıq qurucılığı: yerli küreşten global tanuvğa”, “Kelecek on yıl içün yollar: tamır halqlarınıñ öz-özüni tayin etüvi, iklim adaletligi ve “İnsan aqları”.

Öz çıqışında Bariiev qayd etti ki, bugün pek çoq insan Birleşken Milletler Teşkilâtınıñ faaliyetini tenqit etse de, Birleşken Milletler Teşkilâtınıñ tamır halqlarına nisbeten semereliligini şübe altına alsa da, müsbet bir dinamika da bar – Birleşken Milletler Teşkilâtı çerçivesinde tamır halqlarınıñ aqlarını qorçalav mehanizmleri meydanğa ketirildi, tamır halqlarınıñ mevzusı Birleşken Milletler Teşkilâtınıñ normativ aktlarında ve teşebbüslerinde köz ögüne alındı.