Ukrayina Diplomatik Akademiyasında Gagauz medeniyeti künü keçirildi

16.10.2025

Orta küz ayınıñ 15-nde Ukrayina tış işleri nazirliginiñ desteginen Gagauz cemiyetleri birligi Ğ. Udovenko adına Ukrayina Diplomatik akademiyasınıñ toplaşuv salonında olıp keçken tedbirni teşkil etti. Davet etilgenler arasında tış işleri naziri Andriy Sıbiğa ve onıñ apayı, qırımtatar halqınıñ lideri, Ukrayina halq mebusı Mustafa Cemilev, Qırımtatar Milliy Meclisiniñ reisi Refat Çubarov, Türkiyeniñ Ukrayinadaki elçisi Mustafa Levent Bilgen, Ukrayinada akkreditatsiya etilgen diplomatik missiyalar ve devlet müessiseleriniñ vekilleri, gagauz cemiyetiniñ azaları bar ediler.

Tış işleri naziri Andriy Sıbiğa hayırlav sözünde: “Gagauzlar – ukrayin cemiyetiniñ ayırılmaz, bütünleşken, organik qısmıdır. Bugün, ğaliba, “Ukrayinanıñ tamır halqları aqqında” qanunınıñ Gagauz cemiyetine de tarqatılması aqqında aytmaq doğru olur edi”, dep bildirdi.

Tedbirniñ musafirlerine Gagauzlarnıñ medeniyeti aqqında tarif etken fotoresim sergisi ve ekspozitsiya taqdim etildi. Gagauzlar – Odesa vilâyetiniñ bir qaç rayonında yaşağan ve Ukrayinada 32000-ge yaqın sayılğan halqtır. Gagauzlarnıñ tarihı aqqında Ukrayina Milliy ilimler akademiyasınıñ mühbir azası, akademik Serğiy Seğedadan ve Gagauz cemiyetleri birleşmesiniñ reisi Yuriy Dimçoglonıñ bugünki vaziyeti aqqında esabatlar bar edi, olarda Ukrayinada gagauz medeniyeti ve tili inkişafı, cemaat faaliyetinde iştirak etüv ve Ukryaina serbestligini qorçalav aqqında söz yürsetildi. Sevda gülü / Nazik gülçember folklor taqımınıñ kontserti, yırcı Natalâ Deniz ve Sofiya Tsonkovanıñ çıqışları ve ananeviy yemekler de bar edi.