Mustaqillik künü hayırlı olsun, Ukrayina!

24.08.2025

Ürmetli vatandaşlar!

Ukrayinlerge rusiye istilâcısına qarşılıqta qol tutqan çeşit memleketlerden ve qıtalardan Ukrayina dostlarınıñ çoqmillionlı ürmetli qardaşlarımız!

Ukrayinalılarnıñ bir qaç nesli öz toprağında ve öz devletinde serbest yaşamaq aqqı oğrunda küreşti, lâkin tış quvetler, başta rusiye imperiyası, soñra şuralar birligi bu aqqını zorbalıqnen alıp ketti.

Lâkin 1980 seneleriniñ soñunda ukrayin halqınıñ ğayretleri ve fedakârlığı muvafaqiyetnen yekünlendi – Ukrayina mustaqil oldu!

Amma azatlığımıznıñ 34 yılından berli on ekinci kere bu künni rusiye-Ukrayina cenkiniñ ateşinde köremiz. Bu ağır sınavdır, amma ukrayin halqı – bütün milletlerden Ukrayina vatandaşları – onı şerefnen keçe, bütün dünyağa ruh küçü ve dayanıqlığını köstere.

Bu sebepten, bugün biz Ukrayina arbiy hızmetçileri, Ukrayina qorçalayıcılarına minnetdarlığımıznı bildiremiz, olarnıñ sayesinde Ukrayina bütün dünyağa isbatlay ki, mustaqil Ukrayina devleti teşkil etildi ve bu dünya qadar qalacaq!

İşğal etilgen Qırım – tamır qırımtatar halqınıñ vatanı ve diger işğal etilgen ukrayin topraqları işğalden azat etilecek, Ukrayinanıñ topraq bütünligi ğayrıdan tiklenecek, Rusiye duşmanları ise yeñilecek ve cezalanacaq.

Qırımtatar Milliy Meclisi ve şahsen özümniñ adından sizlerni Ukrayina Mustaqillik kününen samimiy hayırlayım!

Ukrayinağa şañ-şerefler!

Refat Çubarov,
Qırımtatar Milliy Meclisiniñ Reisi

2025 senesi arman ayınıñ 24-ü
Kıyiv ş.