“Ukrainanıñ tamır halqları: cenk ve vaqtınca işğal vaqtında kimlik ve aqlarınıñ saqlanması” tögerek masası olıp keçti

18.08.2025

2025 senesi arman ayınıñ 14-nde, Dünya tamır halqları halqara kününe bağışlanğan “Ukrainanıñ tamır halqları: cenk ve vaqtınca işğal vaqtında kimlik ve aqlarnıñ saqlanuvı” tögerek masası olıp keçti.

Tögerek masanı Herson VDMniñ Gumanitar siyasetni yerine ketirüv departamenti, Dnipropetrovsk VDMniñ medeniyet, turizm, milletler ve dinler idaresi, Geniçesk şeer şurasınıñ medeniyet ve sport bölügi, Qırımtatar Milliy Meclisiniñ azası Gülnara Bekirovanen beraberlikte teşkil ettiler.

Onlayn şekilde keçirilgen tedbirde Qırımtatar Milliy Meclisiniñ reisi Refat Çubarov, Ukraina halq mebusı Tamila Taşeva ve Ukraina Prezidentiniñ Qırım Muhtar Cumhuriyetindeki Daimiy Temsilcisiniñ muavini Denıs Çıstikov iştirak ettiler.

Tedbirniñ maqsadı – Ukrainanıñ tamır halqlarınıñ vaziyetine diqqat çekmek, cenk şaraitinde olarnıñ aqları, medeniyeti ve tilini qorçalamaq, em de bu küreşte devlet ve halqara toplulıqnıñ rolüni qayd etmek.

Herson vilâyetiniñ devlet memuriyetiniñ reisiniñ muavini Dmıtro Butriy qayd etti ki, vaqtınca işğal etilgen topraqlarda duşman tamır halqlarınıñ aqlarını boza: işğalciler ana tilinde tasil almağa yasaq eteler, medeniy ve diniy merkezlerni yoq eteler, faalcilerni taqip eteler ve apiske alalar.

“Bu, serbest halqnıñ kimligini, sesini yoq etmek ıntıluvıdır. Herson vilâyeti bizim tamır halqlarımıznen beraber edi, bar ve olacaq. Ve beraberlikte biz, ğalebe qazanacaq soñ, toprağımıznı ğayrıdan tikleycekmiz”, – dedi o.

Öz çıqışında Geniçesk ŞAMniñ yolbaşçısı Yevheniy Rodionov hatırlattı ki, tolu miqyaslı istilâdan evel Geniçesk şeeriniñ topraq cemiyeti bir çoq tamır halqınıñ, hususan bugün ekinci sürgünlikni başından keçirgen ve cenk sebebinden evlerini terk etmege mecbur olğan qırımtatarlar içün ev edi.

Spikerler şunı da muzakere ettiler:

• tamır halqlarınıñ aqlarınıñ şimdiki vaziyeti ve halqara destek;

• işğalde yaşayışnıñ qıyınlıqları;

• repressiyalar ve taqip;

• insan aqlarınıñ bozuluvlarını qayd etüv;

• haber havfsızlığı ve yañlış malümatqa qarşılıq;

• medeniy mirasnıñ saqlanması.