Ukrayina halq mesbularınıñ Türkiyege ziyareti

03.07.2025

Oraq ayınıñ 2-nde Ukrayina halq mebuslarınıñ Türkiye Cumhuriyetine ziyareti olıp keçti. Ukrayina parlament delegatsiyasınıñ erkânına Türkiyenen parlamentlerara alâqalar gruppasınıñ reisdeşleri, Qırımtatar Milliy Meclisiniñ reisiniñ muavini Ahtem Çiygöz ve halq mebusı Kostântın Kasay kirdiler.

Ziyaret çerçivesinde Türkiyedeki Ukrayina Fevqulâde ve Vekâletli Elçisi Nariman Celâlnıñ iştirakinen Türkiye Büyük Millet Meclisinde bir sıra körüşüvler keçirildi.

Hususan, ukrayin vekilleri NATO Parlament assambleyasında Türkiye parlamentiniñ eyyetiniñ reisi Mevlüt Çavuşoğlu, Türkiye parlamentiniñ Ukrayina Yuqarı Şurasınen Dostluq gruppasınıñ azalarınen, onıñ reisi Tuğrul Türkeşniñ yolbaşçılığında, ve Türkiye Büyük Millet Meclisiniñ halqara işler eyyetiniñ reisi Fuat Oktaynen körüşti.

Körüşüvler vaqtında taraflar eki taraflı kün tertibiniñ aktual meselelerini, em de , hususan parlamentlerara işbirlik kontekstinde, Ukrayina ve Türkiye arasında strategik ortaqlıqnıñ ilerideki inkişaf perspektivalarını muzakere ettiler.

Ayrıca diqqat halqara parlamentlerara institutlarda nazar noqtalarınıñ idaresine, parlamentlerara deñişmelerniñ faalleştirilmesine ve, eñ esası, Türkiye tarafından Ukrayinağa ileride de siyasiy ve gumanitar yardım meselesine ayırıldı.

Ziyaret çerçivesinde ukrayin parlamentçileri ukrayin ve qırımtatar cemiyetleriniñ temsilcilerinen körüştiler, em de Türkiyedeki qırımtatar teşkilâtlarınıñ medeniyet ve yardımlaşma birliginiñ Merkeziy ofisini (Ankara ş.) ziyaret ettiler. Olar milliy kimlikniñ saqlanuvı, bu cemiyetlerge Türkiyede qol tutuv ve Rusiye istilâsına qarşılıq meselelerini muzakere ettiler.

Körüşüvde Ukrayinanıñ Türkiyedeki Elçisi Nariman Celâl, Türkiyedeki Qırımtatarlarnıñ Medeniyet ve yardımlaşuv birliginiñ Merkeziy ofisiniñ yolbaşçısı Mükremin Şahin, Qırımtatar Milliy Meclisiniñ azası ve Şefiqa Gasprinskaya adına Halqara qadınlar teşkilâtınıñ yolbaşçısı Gayana Yüksel, Qırım Fondunıñ yolbaşçısı Tuncer Kalkay, Türkiyedeki Qırımtatarlarnıñ Medeniyet ve yardımlaşuv birliginiñ Merkeziy ofisiniñ yolbaşçısınıñ muavini İsmet Yüksel, Merkeziy ofisniñ idare azaları Serra Menekay ve Yülkü Aksel iştirak ettiler.