4 yıl evelsi Yuqarı Şura “Ukrayinanıñ tamır halqları aqqında” Ukrayina qanunını qabul etti

01.07.2025

4 yıl evelsi Yuqarı Şura “Ukrayinanıñ tamır halqları aqqında” Ukrayina qanunını qabul etti

“Ukrayinanıñ tamır halqları aqqında” Ukrayina qanunı 2021 senesi oraq ayınıñ 1-nde Ukrayina Yuqarı Şurası tarafından qabul etildi. Ukrayina prezidenti Volodımır Zelenskıy oraq ayınıñ 21-nde qanunnı imzaladı, o ise 2021 senesi oraq ayınıñ 23-nde aqqını aldı.

Qanunğa köre, Ukrayinanıñ tamır halqları olaraq qırımtatarlar, qaraylar, qırımçaqlar tanıla.

Vesiqada añlatılğanı kibi, Ukrayinanıñ tamır halqı – Ukrayina toprağında şekillengen, özgün til ve medeniyet taşıyıcısı olğan, ananeviy, içtimaiy, medeniy ya da temsiliy organları olğan, özüni Ukrayinanıñ tamır halqı olaraq tanığan, ealisinde qavmiy azlıq teşkil etken ve Ukrayina tışında öz devlet qurulışı olmağan qavmiy muhtar toplulığıdır.

“Tamır halğı” ve “milliy azlıq” ıstılalarını ayırmaq müimdir, çünki soñkisi, tamır halqlarından farqlı olaraq, yaşağan memleketleriniñ sıñırlarından tış qavmiy olaraq aqraba devletlerge saiptir. Ukrayinada milliy azlıqlarnıñ temsilcileri çoq, tamır halqlarınıñ ise – tek üç bar.

Qanun Ukrayinanıñ tamır halqlarınıñ uquqiy statusını belgiley ve olarnıñ aq-uquqları ve menfaatlarınıñ qoruvı boyunca kefaletlerni belgiley. O, tamır halqlarınıñ medeniy, malümat ve diger aqlarını qorçalamağa ve olarğa Ukrayina devletinen çalışmaq içün mehanizmler ve aletlerni bermege doğrultılğan. Bundan ğayrı, tamır halqlarınıñ temsil organları da tanıla.

Amma, qanun qabul etilgen soñ dört yıl keçken soñ, onıñ bütün maddeleri yerine ketirilmedi. Böyleliknen, Ukrayina Nazirler Kabineti Qırımtatar Milliy Meclisine tamır halqınıñ temsiliy organı statusını bermedi.