Ukrayinanıñ  tarihı milliy müzeyine 4 qıtağa barğan qırımtatar bayrağı berildi 

01.07.2025

İlk yaz ayınıñ 30-nda, qırımtatarlarnıñ tek temsilci-icra organı olğan Qırımtatar Milliy Meclisi qurulğanınıñ 34-ünci yıldönüminde, Ukrayinanıñ tarihı milliy müzeyine büyük qırımtatar bayrağı teslim etildi.

9 ay devamında qırımtatar bayrağı Qırımtatar maaliy merkezi (QMM) tarafından teşebbüs etilgen “Bayraqnen birleştirilgenler – #LIBERATECRIMEA” halqara aktsiyası çerçivesinde dünyanı dolaşıp başladı. Bayraqta bütün dünyadan aktsiya iştirakçileriniñ yüzlernen imzası bar, olar qırımtatar halqına qol tutqanlarını ve Qırımnıñ azat etilmesini talap etkenlerini bildireler.

Tedbirde Qırımtatar Milliy Meclisiniñ vekilleri, Qırımtatar Maaliy Merkeziniñ taqımı ve müzey hadimleri iştirak ettiler.

Qırımtatar Milliy Meclisiniñ reisi Refat Çubarov öz çıqışında şunı qayd etti:

“Bu eksponat tarih, küreş, birdemlikniñ şaatlığıdır. Qırım azat etilecek soñ müzeylerimiz, azatlıqnı yaqınlaştırğan qaramanlar ve vaqialar aqqında ikâye etmeli. Müzey fondlarınıñ bu şekilde toldurılması sayesinde kelecek nesillerge bugünki tarihımıznı ögrenmege ve añlamağa imkân berecek maddiy iz qalacaq”.

QMMniñ idare reisi ve Meclis azası Eskender Bariiev aktsiyanıñ ğayesi, onıñ ömürge keçirilmesi ve neticeleri aqqında tarif etti.

“Bu teşebbüs ukrayin ve qırımtatar diasporaları sayesinde kerçekleşti. Doquz ay devamında bayraq 28 memleketniñ halqını birleştirdi. İştirak etken er keske teşekkürler – bu aqiqiy global birdemlik edi”, – dep añlattı o.

Bu vaqia qırımtatar halqına ve Qırım içün ukrayin küreşine halqara destekniñ quvetleştirilmesine daa bir müim adım oldı. Bayraq, biñlernen kilometr yol keçken soñ, müzeyde saqlanacaq, küreş, ümüt ve birlikniñ zemaneviy tarihınıñ müim eksponatı olacaqtır, dep QMM qayd etti.