Qırımtatar bayrağı kününe bağışlanğan tedbirler

28.06.2025

Qırımtatar bayrağı künü endi on eki yıldır rusiyeniñ Qırım işğali şaraitinde qayd etile. İşğalli rusiye akimiyeti qırımtatar bayrağını yasaq etmege tırışmasa da, onı Qırımda ev, daire, maşna tışında tek işğalli akimiyetniñ izninen qullanmaq mümkün.

2014 senesi kiçik ayda, Rusiye istilâsı Qırım yarımadasında açıq şekilde kösterilip başlağanda, dünya kütleviy haber vastalarında qırımtatar halqı aqqında tasavurlarnı deñiştirgen bir sıra video peyda oldı. On biñlernen insan altın tamğanen mavı bayraqlar ile Aqmescit ve yarımadanıñ diger şeerleriniñ meydanları ve soqaqlarına Vatanını qorçalamaq, Ukrayina topraq bütünligini desteklemek içün çıqtı. O vaqıt qırımtatar bayrağı dünyaca tanıldı.

Bugün qırımtatar bayrağı diplomatik qabul etüvlerde ve halqara forumlarda lâyıq yer ala, onı Ukrayinanıñ er bir köşesinde körmek mümkün. O, dünyanıñ pek çoq paytahtı ve şeeriniñ meydanlarında, Ukrayina tarafdarları, qırımtatar ve ukrayin diasporasınıñ vekilleri toplaşqan yerlerde köterile. Qırımtatar bayrağı tek Qırımnıñ tamır halqınıñ timsali degil – o, işğalge qarşılıq bayrağı, Qırımnıñ Ukrayinanen bölünmezliginiñ timsalidir.

Bu sene – 2025 senesi ilk yaz ayınıñ 26-nda – qırımtatar bayrağına ürmet kösterüv tedbirlerniñ ve aktsiyalarnıñ sayısına köre de, olar keçirilgen memleketlerniñ sayısına köre de eñ keniş oldı.

Añlaşılır ki, Qırımtatar bayrağı kününe bağışlanğan çeşit tedbirlerniñ keçirilüvi Ukrayina devlet akimiyeti ve idaresi, yerli idare organları ve devlet memuriyetleri, tasil müessiseleri, cemaat teşkilâtları, faalciler ve göñüllilerniñ, iş adamlarınıñ iştiraginen mümkün oldı.

Qırımtatar Milliy Meclisi Qırımtatar bayrağı kününe bağışlanğan tedbirlerniñ azırlanuvında işbirlik içün ayrı minnetdarlığını bildire:

– Ukrayina Tış işler nazirligine, olarnıñ çalışması sayesinde, qırımtatar bayrağı dünyanıñ er köşesinde, er qıtada dalğalanıp başladı, çünki bu künni qayd etüvge Ukrayinanıñ tış elçihaneleri, temsilcilikleri ve missiyaları qoşuldı – Avropa, Amerika, Asiya, Avstraliya ve Afrika bu künni qayd ettiler.

– Ukrayina Prezidentiniñ Qırım Muhtar Cumhuriyetindeki Temsilciligine, o, Ukrainada akkreditatsiya etilgen memleketlerniñ diplomatik korpusınıñ vekilleri, ukrayin ve qırımtatar cemiyetleriniñ azaları, jurnalistler ve faalcilerniñ iştirak etkenleri Kıyıvde Mihaylivska meydanında tedbirni teşkil etti.

– Qırımtatar bayrağını kötergen vilâyet devlet (arbiy) memuriyetleri, Kıyiv şeer şurası ve Kıyiv şeer devlet memuriyetine;

– Ukrainada yerli idare organlarına;

– Qırımtatar cemaat teşkilâtları ve hayriye fondları, aliy oquv yurtları ve mektep ocaları, iş adamları, teşebbüs gruppaları, faalciler ve göñüllilerge.

Ve samimiy minnetdarlığımıznen beraber, yazıq ki, biz er bir teşkilâtnıñ adını, reberleriniñ ve faalcileriniñ adlarını aytıp olamaymız. Amma emin oluñız ki, er kesniñ ğayretleri ve issesiniñ tek maqsadı bar – Ukrayinanıñ Rusiye duşmanını yeñmesi ve Qırımnıñ azat etilmesi.

Yaşasın Qırım!

Yaşasın Qırımtatar halqı!

Слава Україні!

Refat Çubarov,

Qırımtatar Milliy Meclisiniñ Reisi